Mawkyrwat, Jylliew, 01: U Deputy Commissioner jong ka South West Khasi Hills District, Mawkyrwat u pyntip sha ki paid nongshong shnong ba ka Sorkar India ka la ai por ïa ka sorkar jylla ban pynbiang ryntih noh marmar ïa ki Aadhaar jong ki khyllung khynnah kiba dei ki nongïoh myntoi ïa ka Special Nutrition Programme Scheme ne ki skhim ai bam ïa ki khynnah kaba la long ka jingkyrkhu ïa ki khynnah rit kiba la ïoh ïa ki jingbam kiba tei ïa ki met ki phad jong ki lyngba katei ka skhim hynrei ki ban hap duh noh ïa kita ki jingmyntoi lada kim don ïa ka Aadhaar Card.
Kumta la ïa wer ïa ki kmie ki kpa jong ki hep kiba rit bad ruh ïa kiba la san ba kin shimkhia ban pynkhreh ïa ki khun jong ki ban leit mih sha ki jaka ba la buh kyrpang na ka bynta ban shna ïa ki Aadhaar Card bad lada ki khun jong ki lane ma ki kim don ïa ki Birth Certificate, ki briew kiba la buh da ka sorkar kin sa ïarap ban batai kumno ban leh, ban pynsuk ïa ki paidbah.
Ki nongshna Aadhaar ba la pynbeit na ka ophis DC kin sa wan ha ki shnong jong ki katkum ki program ba la shna kyrpang bad yn sa shna Aadhaar ïa ki bad ki khun rit jong ki.
Lah ruh ban kdew hangne ba ka Sorkar India ka la pynsangeh noh ïa ka pisa jong kito ki Job Card Holder kiba long ki nongbylla shispah sngi ki bym don ïa ka Aadhaar Card bad wat kito kiba don ïa ka Smart Card (MHIS) ruh mynta ki shem jynjar ban siew bai Hospital lada kim don ïa ka Aadhaar Card bad lada ki paidbah kim don lane kim pyndonkam ïa ki Aadhar card kin duh ïa kiwei ruh ki skhim jong ka Sorkar India ka ban long ka jingduh jingmyntoi kaba khraw.
