ïakhun ka NPP Farmers Front sa ïa ka jingeh jong ki nongrep synsar bad nongrep kwai

Shillong, Ïaiong 23 : Haduh 500 metric ton ka dawai sboh kaba la mang na ka bynta ki nongrep ka jylla kan sa poi noh sha ki paidbah khnang ba kin ïoh ban pyndonkam na ka bynta ban thung ïa ki mar rep mynta ka samoi.
Haba kren bad ki lad pathai khubor ki nongïalam ka NPP Farmer’s Front kynthup ïa u Bah HM Shangpliang bad Secretary Bah Egenstar Kurkalang, ki la ïathuh ba kane ka dawai sboh ka don mynta ha Guwahati bad shen yn sa noh pynpoi sha Shillong.
“Mar ïa poi shane, ngin sa sam pat sha ki retailer bad nangtei pat kin sa pynpoi sha ki paidbah kiba kwah ïa kine ki dawai sboh,” ong u Secretary ka Farmer’s Front, Bah Egenstar Kurkalang haba kren bad ki lad pathai khubor.
Haba kren pat halor ka skim CM Assure kaba dei kyrpang na ka bynta ki nongrep synsar haba hiar ka dor ha iew, na ka liang u Chairman ka Farmer’s Front, Bah HM Shangpliang u la ïathuh ba ha ka jingïalang ha kane ka sngi, ki nongrep ki la ud ba ka jingshim jong ka sorkar tang 800 kilo u synsar kam pat biang satia namar ki don da ki hajar kilo kiba la hap ban duh ei.
“La pyntip ba bun ki paidbah kim pat tip shaphang kane ka skim bad don ruh kiba kyrpad ba ka sorkar kan shim khambun u synsar bad ruh ban kyntiew shuh ka dor khnang ba ki nongrep kin ym duhnong,” ong u Bah HM Shangpliang.
La ïathuh ba katkum ka dor synsar ba ka sorkar ka shim, ïa u Grade A ka sorkar lyngba ka skim CM Assure la thied ha ka dor 55 tyngka shi kilo, nangta ïa u Grade B ha ka dor 40 tyngka bad ïa u Grade C ha ka dor ba 30 tyngka shi kilo.
“Halor kane, ngi la rai ban rah sha ka sorkar ban pynsngew ïa kane ban kyrpad ban shim kham bun kilo shuh u synsar bad ruh ïa ka dor,” u la ong.
Ha kajuh ka por u la ïathuh ba ka la don ka jingud halor ka jingslem palat ban rejistar ïa ki nongrep ban ïoh ïa kitei ki jingmyntoi naba haduh mynta ki dang don tang 5657 ngut kiba la rejistar haduh ka 21tarik u Ïaiong,2025. La pyntip ruh ba na kine, 4182 la dep ïoh ïa ka sanction bad ka pisa kaba la mang ka long 5.82 klur tyngka.
Haba kren pat halor ka jingïap lut ki shylluit kwai, u Bah HM Shangpliang u la ïathuh ba ki paidbah ki la pyntip ba kane ka jingpang ki dieng kwai ka la pur kylleng kylleng mynta bad ka la ktah jur ruh ïa ka kamai kajih jong ki nongrep kwai.
“Ka la don ka jingkyrpad na ki paidbah ban synreit dawai ban tehlakam ïa kane ka jingpang ki diengkwai. Watla ka CM Assure ka don hynrei ban ïarap shi rta donkam ban ïoh ïa ki dawai kiba paka bad kiba biang ban ïakhun ïa kane ka jingpang ki dieng kwai,” u la ong.
Ha kane kajuh ka sngi, ka Farmers Front ka la jied bad pynskhem ruh ïa ki nongkitkam jong ki distrik na bynta ki disrtrik jong ka rilum Khasi bad Jaintia ryngkat ka jingbthah pat ba kin thaw ïa ka komiti ha ki distrik bad ruh ha ki block kiban don ha man la ki constituency khnang ba kin lah ban peit pat ïa ka jingeh jong ki nongrep.