Khliehriat, Jymmang 31: Ki jingialang paidbah jong ka party Congress ki la ïaid shaid shaid hapoh ri lum Jaiñtia ba kynthup ha West Jaiñtia Hills bad ha East Jaiñtia Hills, ha kaba myn ha ka 29 tarik mynta u bnai u State President jong ka party Congress u la pynlong jingialang ha Khliehriat bad ha ka 30 tarik pat u bah Emlang Laloo u la pynlong jingialang ha iingsah jong u ha ka Shnong Saitsama, west Jaiñtia hills na ka bynta ka MLA election ka ban sa long ha u snem 2028 bad na ka bynta Kane ka MP election.
Kum ban shu pynkynmaw, u bah Emlang Laloo u dei u kyrtong na ka party congress uba la ïa ai reng ha ka election MLA myn ha u snem 2023, une u rangbah u la sdang ban lum ban lang biang ïa ki paidbah nongkyrshan jong u namar ba u don jingmut ban ia khun biang ïa ka election MLA ka ban long ha u snem 2028.
Ha ka jingialang ha Saitsama, u bah Emlang Laloo u la pynkynmaw ïa ki paidbah ba u la shongthait khlem pat dei por (VRS) na ka kam sorkar kaba u la bat kum u heh sorkar ne u officer rangbah jong ka tnat Soil & Water conservation Department jong ka Sorkar Meghalaya, u la ong ba u la iehnoh ïa ka kam dei namar ba u kwah ban aiti ialade sha ka jingshakri paidbah, ha kane ka jingialang u la ai Khublei ïa baroh ki nongkyrshan jong u kiba la kyrshan radbah ïa u ha u snem 2023 ha ka jingia ai reng jong u pyrshah ïa u bah Sñiawbhalang Dhar bad ha ka election jong u snem 2023 u la ioh vote haduh 14846 votes kaba dei ka vote kaba lah jan poi sha ka jingjop, mynta ka kynti ruh u bah Emlang Laloo u kyntu bad Kyrpad ïa ki paidbah nongkyshan jong u ba kin long kiba iaineh bad u bad ba kin nang iai trei shitom shuh shuh namar ka jingjop kam long shuh kaba eh ha kane ka sien ba ar namar haba kheiñ dei sa tang khyndiat votes hi dang donkam, u la bynrap shuh shuh da kaba u la ong ba mynta ka party ka la don ka jingkyrmen kaba Khraw ban jop bad pynpaw ruh ka jingsngew skhem ba ha ka election MLA ka ban long ha u snem 2028 u la sngew tikna ba ka jingjop kan dei beit ka jong u.
U la kyntu bad sneng ruh ïa ki nongkyrshan jong u ba kim dei ban shah pynbiej ha ka bor jong ka pisa bad ha ka bor jong ka leh mynleh ieit jaitbynriew kaba long tang na ka bynta Ka myntoi shimet hynrei ban iai shaniah ha u kum u briew uba don ka jingthrang ban iai kyntiew ïa ka thaiñ lajong bad kular ruh ba nangne shakhmat un leit iuh kjat sha baroh ki shnong ki thaw kiba don hapoh ka Constituency jong u ban lum ban lang biang ïa ki paidbah kiba dei ki nongkyrshan jong u ba ha kane ka kynti ruh kin sngewbha ban kyrshan biang ïa u haduh ban da poi sha ka jingjop donburom.
Haka juh ka por u bah Emlang Laloo u la Kyrpad ruh ïa ki paidbah ba kin ai ruh ka jingkyrshan ïa u kyrtong ka party Congress u bah Vincent.H.Pala u ban iakhun ha kane ka election shiteng samoi kaba dei ka M.P.Election ban pynjop donburom biang ïa u ha kane ka M.P.Election.
Ha ka jingialang ha Khliehriat, East Jaiñtia Hills District, u bah Vincent.H.Pala ha ka jingialang ba la pynlong myn ha ka 29 tarik ha Conference hall ha Vika Guest House, Khliehriat West, u la ai mynsiem ïa ki paidbah nongkyrshan jong u da kaba ong “Wat ong ba ka Congress ka la iap” bad ha kane ka jingialang ki la wan poi da ki spah ngut ki briew kiba na ki shnong bapher bapher na East Jaiñtia Hills District kiba dei ki nongkyrshan jong ka party Congress.
Shuh, shuh u bah Vincent Pala, u la pynsgew ba ha kane ka kynti ruh un dang iakhun ïa kane ka election M.P shiteng samoi bad u la kyntu ïa ki paidah nongkyrshan ba kin nang iai trei shitom shuh shuh ban pynkiew ïa ka party bad ruh ba kyntu ruh ba kim dei ban ngop ha kano kano ka jingshah pynbiej.
Ha kane ka jingialang, utei u nongialam jong ka party Congress u la pynsngew ïa ki kam kiba radbah kiba u la leh ha ka por ba u dang long u M.P, na ka bynta ka jingbit jingbiang ki paidbah ka jylla Meghalaya bad ki paidbah jong ka thaiñ shatei lam mihngi, ki kam kiba radbah kiba u la lah ban pynurlong ki kynthup ka jinglah ban wanrah ïa ka surok Shillong-Jowai Bypass, ka surok Shillong-Nongstoin-Tura, ka surok Shillong-Dawki, ka jinglah ban wanrah ïa ka kad-lingsuiñ kaba na Guahati sha Bangkok, ka jinglah ban wan rah ïa ka ïingbishar Meghalaya High Court, ka bus kaba mih na Guahati sha Bangladesh, ka jingkyntiew shuh shuh ïa ki shlem bor ding electrict hapoh ka jylla lane kita ki Grid Station bad Sub Grid Station, kaba kyntiew shuh shuh ïa ka shlem ai jingsumar ka NEIGRIM hospital Shillong bad kiwei kiwei.
Ïa ka jingialang la pyniaid da u President District Congress Cemmitte East Jaiñtia Hills District,bah Micheal Nongtdu, la ïa don ryngkat lang ruh u MDC barim, u bah Richardsing Lyngdoh, Secretary District Congress Cemmitte East Jaiñtia Hills District, bah Rubuen Nongtdu, la ioh ruh ïa ka jingpynkup burom ïa ki nongkitkam jong ka District Congress Cemmitte East Jaiñtia Hills District, ka District Youth Congress Cemmitte, East Jaiñtia Hills District ha ki Block Level bad ki Mahila Unit bapher bapher.
