Ïaid paidbah ki Sengbhalang bad nongshong shnong ban dawa pyllait ïa u rangbah ba kem ka tnad Forest, Assam

Nongpoh, Naitung 06: Ki paidbah nongshong shnong ka shnong Belahari ha ryngkat ki Sengbhalang naduh ka RBYF, KSU, HYC na Ri Bhoi Sepngi, ki seng Longkmie bad ki nongshong shnong kynthei bad shynrang ki la pynlong da ka jingïaid paidbah ban dawa na ka tnad Forest ka Assam ban pynlait noh ïa uwei u rangbah, u Bah Bakstar Diengdoh na ka Shnong Belahari, uba la shah kem ha ka tnat Forest jong ka Assam ha ka 3 tarik u Naitung 2024.
Kane ka jingmih kine ki sengbhalang bad ki paidbah nongshong shnong ban ïaid paidbah ryngkat ka jingrah da ki lama bad ki banner, ka long ban pynrem jur ïa ka jingkynnoh leh donbor ka tnad forest na Assam, kaba ju pynthud beit ïa ki paidbah nongshong shnong ka Meghalaya ha katei ka thaiñ khappud.
Kum ban pynpaw, ka daw kaba la pynlong ïa ki paidbah bad ki sengbhalang ban pynpaw ïa ka jingpyrshah da kaba ïaid paidbah, ka dei halor jingshah kem u Bah Bakstar Diengdoh, ha ka 10 tarik Jylliew 2024 katba u Bah Bakstar Diengdoh u dang kit ïa ki maw na kawei ka jaka kaba dang hab ha khappud jong ka jylla Meghalaya bad Assam na ka bynta ban pynbha ïa ka surok paidbah ha ka shnong Belahari katba ki dang treimon sngewbha ban pynbha ha ki bynta kiba la sniew. Ki Pulit jong ka tnat Forest Assam ki la kem ïa u ha ryngkat bad ka kali jong u bad ki la rah sha thanad.
La ong ruh hadien katei ka jingkem, ka tnad Forest Assam ka la dep ban pynlait bad tang hadien pat ki la phah khot hajir biang ïa u da ka jingthoh ban wan ïakren sha Assam, kaba dei ha ka 3 tarik u Naitung 2024 bad kane ka la kylla long da khongpong, ha kaba ha katei ka sngi ki la kem biang ïa u.
Haba kren ruh ha kane ka sngi, naduh ki nongïalam sengbhalang, ki nongïalam shnong bad ki longkmie, ki la pynpaw ïa ka jingpyrshah kaba jur, halor kane ka jingshah kem une u rangbah bad kum kine ki kam leh donbor ki ju mad na ka por sha ka por bad dei namar kane ka daw ki hap ban pynlong da ka jingïaid paidbah ban pyni sha ka pyrthei ba ki pyrshah ïa kane ka kam leh donbor ka Assam, da kaba dawa ruh ba ka tnad Forest Assam ka dei ban pynlait noh mardor ïa utei u rangbah khnang ban wan ka shongsuk shongsaiñ ha ki shnong khappud.
Na ka liang kitei ki nongïalam, kiba la ai jingkren ki la kyrpad ruh ïa ka sorkar Meghalaya lyngba u Myntri Rangbah ka jylla, u Conrad K. Sangma, ba u dei ban ïakren mardor sha ka sorkar Assam ban pynlait noh ïa une u rangbah bad kum ka Assam ruh ka dei ban ïaburom markylliang na ka bynta ban pynneh ïa ka shongsuk shongsaiñ bad lada ka long ha kane ka rukom kine ki kam pynibor ka tnat Forest kan ktah shisha ïa ka shongsuk shongsaiñ ki paidbah ha khappud ka Meghalaya bad Assam.