Plie lad ka MESCM ban pynïaid ïew ïa ki tiar jong ki nongseng kam lajong

0

Shillong, Naitung, 06: Ka Meghalaya Entrepreneurs Society For Community Markets (MESCM) kum kawei na ki kynhun kaba angnud ban kyntiew ïa ki nongseng kam lajong ka la pynlong ïa ka iew ïadie ïathied kaba lai sngi ha Khasi National Dorbar Hall, Mawkhar, Shillong da kaba buh hakhmat ïa ka thong ban pynïaid iew ïa ki tiar ba la pynmih da ki nongseng kam lajong ha kylleng ka jylla.
Da ka jingdon jong ka MESCM ka la plie lad ïa ki nongsengkam lajong khamtam ha kum kane ka juk kyrduh kam ban pynlong ïa ki iew ïadie ïa thied ha kylleng ki bynta jong ka Sor Shillong
U nongaiktien jong ka MESCM u Dr. David Kharchandy u la ong, “kum ki briew kiba sngewkhia na ka bynta ki nongseng kam lajong, ngi la shim ïa katei ka rynsan ban sdang da kane ka sienjam kaba yn lah ban ïarap ïa ki nongseng kam lajong ba kin im bad die ïa ki mar ki mata jong ki lyngba ki ïew ïadie-ïathied.”
U la ïathuh ba ha ki sngi bad ki snem kiba la leit, ki la ju ïashimbynta ha ki jingïadie-ïathied bapher-bapher bad nalor ka jingïakynduh shibun ki jingeh kiba har rukom namar ki dor jong ki ‘stall’ ne ki dukan kiba ki ïashim bynta, ki ju kiewdor na kawei ka dor sha kawei pat haduh ban da poi u pud ba kim lah shuh ban ïashim bynta.
“Ngi don ka jingsngewkhia bad ka jingsngew kitkhlieh ban sdang bad ban seng ïa kane ka kynhun ban ai rynsan kaba jem bad kaba kotbor na ka bynta kiba bun ba kin ïashim bynta.” ong u Dr. David.
U Dr. David u la ïathuh ba ki paidbah ka Ri Khasi, Jaiñtia bad Garo ki long ki briew kiba tbit bha ban shna jingshna bad kiba don ïa ki sap bapher-bapher bad kane ka la pynlong ïa ki ban sdang da kane ka sienjam ban plielad ïa ki nongseng kam lajong ba kin pyni bad die ïa ki mar ki mata jong ki.
U la ong ruh ba kane ka kynhun ka plie lad ïa ki nongseng kam lajong ba kin die bad pynïaid ïew ïa ki mar-ki mata jong ki tang ha ka dor kaba jem tang na ka bynta ban ai jingïarap lem ban wai ïa ka Hall, ki jingker-jingda, ki miej ki shuki nalor kiwei-kiwei ki jingdonkam ba kin ïoh pyndonkam ki nongdie jingdie ha katei ka jaka.
Shuh shuh u Dr. David u la ong ba kane ka kynhun ka don tang ar tylli ki thong bad kaba nyngkong ka long ban ai rynsan ïa ki nongseng kam lajong ka jylla kiba dang khynnah da kaba shim ïa ka dor kaba jem hynrei kam mut pat ba kito kiba ym lah kotbor satia ban siew ïa ka bai dukan ba kin duh jingkyrmen bad ka thong kaba ar kaba kynhun ka la buh hakhmat, ka long ban pynphai kylliang da kaba noh jingïarap sha ki jaka ri khunswet, ki jaka shong jong ki riewtymmen, ki briew kiba mad ïa ka jingshah lynshop ha ki bor mariang bad kiwei-kiwei.
U la ïathuh ba ki don ki nongseng kam lajong kiba la pynpaw ba kim lah satia ban siew ïa ka bai ‘stall’ ne ka bai dukan hynrei kum ka kynhun ka la kheiñ noh tang shiteng dor bad u la ong bad u la ïathuh ba ha katei ka rynsan ïadie-ïathied ki la don ki nongseng kam lajong na ki jaka bad ki distrik bapher-bapher kiba kynthup naduh na Ribhoi District, Rilum Garo bad kumta ter-ter.
U la ong ba ka jingïapher ba kane ka kynhun seng kam lajong bad kiwei ka long ba kane ka kynhun ka angnud ban pynphai biang, ban ïarap bad ban ai ïa ka rynsan sha ki nongseng kam lajong ha ka dor kaba jem bad ïa kito ki bym lah siew ruh ka kynhun ka ju ïarap ïa ki.
Ha kajuh ka por, u la ïathuh ba kane ka kynhun seng kam lajong ka don ruh ïa ka jingngeit skhem ba kan dang ïai lah ban leit sa sha kiwei ki jaka bad ki distrik ban pynlong ïa kum kine ki ïew bad ki rynsan ïadie-ïathied.
U la ai mynsiem bad wer lem ruh ïa kiwei ki para nongseng kam lajong khamtam ïa ki samla ba kin mih shakhmat ban ïashimbynta ha kine ki rynsan bad ban trei shitom ha ka kam bad ka sap kaba ki don.

Leave A Reply

Your email address will not be published.