Pynïeng ka KSU da ka khyrdop ILP ha 20 mer, talasi naphang ïa ki kali paidbah

Nongpoh, Naitung 06: Ka Khasi Students Union, Sengkmie ryngkat ka KSU North Khasi Hills District Unit ha ka sngi saitjaiñ hapoh ka jingïalam u President u Bah Lambokstar Marngar bad u General Secretary, u Bah Donald Thabah ki la hiar sha ka thaiñ Ri Bhoi, da kaba pynïeng syndon da ka khyrdop ILP ha 20 mer Pahammawleiñ ba hab ha surok National Highway-6 ha Ri Bhoi, na ka bynta ban talasi ïa ki bar jylla ba wan na shabar khlem da don ki kot ki sla bad ruh ban pyrshah jur halor ka jinglehkuman ka sorkar jylla ban pyntreikam noh ïa ki aiñ kiba tehlakam na ka jingwan rung tuh ki bar jylla sha kane ka jylla Meghalaya.
Ha kane ka sngi, ka seng KSU, ym tang ba ka pynïeng syndon da katei ka khyrdop ILP ban tehlakam ïa ki briew ba rung beaiñ sha ka jylla, hynrei ki la pynlong ruh ïa ka jingtalasi ïa ki kali paidbah ba wan rung sha ka jylla Meghalaya ha kaba ka la pynphai kylla ruh ïa ki bar jylla kiba ym biang ki kot ki sla.
Halor ka jingpynïeng ïa ka khyrdop ILP, la pynlong ruh ïa ki bor Magistrate bad bor Pulit ka Ri Bhoi ban hiar sha katei ka jaka ban ïakren ïa ki nongïalam ka KSU, halor ka jingpynïeng ïa katei ka khyrdop ILP.
Ha kane kajuh ka sngi, ki la leit ruh ban jurip ïa ka Facilitation Centre ba la tei da ka sorkar ha Umling bad la lap ba katei ka centre ban tehlakam na ka jingwan rung beaiñ ki briew kiba nabar ha kaba kane kam shym la treikam satia bad ka la kylla long pynban kum ka ïingjah bad ka ïing kaba ailad pynban ïa ki riewsniew ban leh ïa ki kam beaiñ.
Halor kane u Bah Lambok Star Mangar bad u Bah Donald Thabah, haba ïakren bad ki lad pathai khubor ki la ong ba ka daw kaba la pynlong ïa ka seng KSU ban pynïeng da ka khyrdop ILP ha 20 mer, ka dei ka jingpyrshah jur ïa ka sorkar jylla, kaba la shu leh kuman ban ïakhun pyrshah na ka jingwan rung kynthep ki briew kiba na shabar, kaba buh jingma pynban ïa ka jaitbynriew barit paid ka jylla.
Kitei ki nongïalam ki la ong ruh ba ka seng KSU ka la dep ban dawa ruh ban pyntreikam ïa ka ILP bad ban pyntreikam ïa ka aiñ MRSSA ban khanglad na ka jingwan rung beaiñ ki briew kiba na shabar, hynrei kumba long haduh kine ki sngi, ka sorkar ka leh sting bad leh bym suidñiew kumta ka seng kam banse ban pynieng pynïeng noh ïa kane ka khyrdop ILP.
Ki la ong ruh ba kane kam dei ka sien kaba nyngkong ba la pynïeng ïa ka khyrdop ILP da ka seng bad la bunsien ki la pynïeng ïa kine ki khyrdop ILP, ka daw hi ka long ban tehlakam na ka jingwanrung kynthep ki briew kiba nabar khlem da don ki kot ki sla kiba paka. Ha kajuh ka por ruh ki la ong ba ka seng KSU ka dawa mardor na ka sorkar India ba ka dei ban ai noh ïa ka ILP ban pyntreikam ha ka jylla bad kumjuh ruh ka sorkar Meghalaya ka dei ban pyntreikam noh ïa ka MRSSA ha ka jylla bad lada ka sorkar ka dang buhteng, ka seng kan dang bteng ban buh kum kine ki kyrdop na ka bynta ban tehlakam na ka jingwan rung kynthep ki briew kiba na shabar ka jylla.
Ha kaba iadei pat bad ka Facilitation Centre, u Bah Lambokstar Marngar u la kren shai da kaba ong, “Kan myntoi aïu ba ka sorkar kan tei ïa kane ka Centre ha Umling hynrei ym lah pat ban pyntreikam bad ka long tang ka jingpyrsyrwa ïa ka pisa paidbah kaba la long da ki klur tyngka. Kumta ngi kyrpad naduh ki nongmihkhmat bad ki heh sorkar ba ki dei ban shim khia na ka bynta ban pyntreikam noh ïa ka ILP bad ruh ka MRSSA bad kam don jingmut ban long kita ki nongmihkhmat lada ki don ha kata ka ïing thaw aiñ ban long tang kita ki nongthep contract ban myntoi shimet bad ym na ka bynta ban ïada ïa ki paradoh ki parasnam hapoh ka jylla, da kaba kin shna da kita ki aiñ ba lah ban ïada na ka jingwan rung kynthep ki briew kiba na shabar ka jylla.”
Kitei ki nongïalam ki la ong ba ka KSU ka dang dawa na ka sorkar pdeng ban pyntreikam noh ïa ka ILP bad ïa ka MRSSA bad lada ka sorkar ka kheiñ dewthala, ka KSU kan sa buh syndon da ki khyrdop ILP ha man la ki jaka hapoh ka jylla, wat lada dei ban shim ïa ka aiñ ha ka kti, namar ka jingleh matlah bad ka jingleh kuman ka sorkar jylla.