Ïa shimbynta ki 150 ngut ki nongmareh thong ha ka National Voters Day Run 2024 ha Ranikor

Mawkyrwat, K’lyngkot 25: Kum shibynta jong ka jingrakhe ïa ka National Voters’ Day 2024 ka ophis jong u Deputy Commissioner & District Election Officer, South West Khasi Hills District ryngkat ka ophis u District Sports Officer, South West Khasi Hills District, Mawkyrwat ka la pynlong ïa ka National Voters Day Run 2024 ha Ranikor, Civil Sub Division, South West Khasi Hills District.
Ha kane ka jingïakop mareh la wan ïa shimbynta lang naduh ki samla shynrang bad kynthei, ki hep kiba rit, kumjuh ruh ki longkpa bad longkmie jong ka distrik.
Ka Larijanai Wartde ka nongjop ba wan ha ka kyrdan ba nyngkong, ba-ar ka Larisha Kharwanniang bad ka Teilyntishisha Ramsiej ha ka kyrdan ba-lai jong ki khynnah kynthei ba hapoh ka 17 snem. Katba ki nongjop na ka liang ki khynnah synrang ba hapoh 17 snem ki long u Neverson Jyrwa ha ka kyrdan ba nyngkong, u Johnstar Sohphoh ba-ar, bad u Banshemphang Kharjahrin ba wan ba-lai.
Ki nongjop ha ka karta ba 18 snem shaneng jong ki shynrang ki long, ba nyngkong u Biness Kharlyngdoh, ba-ar u Jomsingstar Ramsiej bad ba-lai u Willborn Wanniang. Nangta jong ki kynthei ba 18 snem shaneng ki long ka Lyntijingkyrmen Kharjahrin ba nyngkong, ka Daplin Wahlang ba-ar bad ka Peitty Wanniang ba-lai.
Ïa baroh ki nongjop la ïoh ban sam da ka syrnod bad kumjuh ruh da ka song pisa bad kynthup ruh ïa ki nongwan ïa shimbynta ba dang khynnah eh kata ïa ki hep rit shynranng bad kynthei. Ym tang kata ka la don ruh ka khusnam kyrpang sha uwei na ki nongïashimbynta ba la kham rangbah kata sha u bah Victor Ïawsai uba la 70 snem karta.
Ïa ka lama jong ka jingmareh-thong ha kane ka sngi la kaweh da u bah T. Lyngwa, IAS, Deputy Commissioner, South West Khasi Hills District bad u Dr. W.L. Narry, Medical & Health Officer.
U Deputy Commissioner jong ka South West Khasi Hills District, u bah T. Lyngwa, IAS, ha ba kren sha ki nongïashimbynta ha ka jingmareh, u la ong ba ka jingrakhe ïa ka National Voters Day ka long kum shibynta ban pyndonburom ïa ki Nongthep Vote jong ka Ri India baroh kawei kumjuh ruh ban pynsngewthuh ïa ki nongthep vote ba kin pyndonkam ïa ka ka jong ka hok. Shuh shuh ula pynshlur ïa ki samla kiba kot ïa ka rta 18 snem shaneng ba ki lah long ban thep vote ba kin sngewbha ban pynrung kyrteng ïa lade ha ka electoral roll ne EPIC bad ban wan shakhmat thep vote bad ban jied ïa ki nongmihkhmat ha ka rukom kaba suk ba saiñ bad kaba ïaid beit ïaid ryntih.
Kumshibynta jong ka jingrakhe ïa ka National Voters Day jong u snem 2024, na ka liang u bah D. Synkon, District Sports Officer, South West Khasi Hills District u la ïoh ban pule ïa ka jingshim smai jong ki paidbah nongshong shnong.
Kiwei de kiba la ïadonlang ha kane ka National Voters Day Run ki long u bah S. Marwein, MCS, Block Development Officer (BDO), Ranikor C&RD Block, u bah O. Passah, Superintendent of Fisheries, South West Khasi Hills District, u bah A. Wanbah, Border Area Development Officer (BADO), Ranikor C&RD Block, u Dr. W.L. Narry, Medical & Health Officer, Mawkyrwat Civil Hospital, bad u C. Ch. Marak, Sub- Inspector, Ranikor Police Station.