Shillong, Naitung 13: Ka Jaintia National Council (JNC) mynta ka sngi ka la dawa na u myntri ka tnat Disaster Management ma Kyrmen Shylla u ba dei ruh u MLA ka thaiñ ban nym shah satia ïa ka sorkar jylla ba kan ïakren halor ka jingpynpoi lynti Rel hapoh Khliehriat, East Jaintia Hills.
Haba kren sha ki lad pathai hadien ka jingkynduh ïa u bah Kyrmen Shylla, u President ka JNC samla Sanbormi Lyngdoh ula ong ba ka seng bad ki paidbah nongshong shnong ka thaiñ East Jaintia Hills ki sngewkhia bha halor ka jingkam u Myntri Rangbah ka jylla u Conrad K Sangma ba ka la don ka jingïakren ban pynpoi Rel shapoh kane ka thaiñ.
U samla Sambormi ula ong baka seng ka pyrshah jur ïa kane ka jingthmu ka sorkar jylla ban pynpoi Rel shapoh ka thaiñ East Jaintia Hills namar kane kan pynsuk shuh shuh ïa ki bar jylla ban wan buhai shnong shapoh kane ka thaiñ bad ka jylla Meghalaya baroh kawei.
“Kam pher la ka dei tang ka Rel kit mar ne Rel kit briew hynrei na ka liang ka seng bad ki paidbah nong shong shnong hi kin ïai pyrshah jur ïa kane ka jingthmu namar ba lada wan ka lynti Rel ka jingmyntoi hi ka dei na ka bynta ki briew ki ba wan nabar” la ong u samla Sambormi.
U samla Sambormi ula kynnoh ba karRel kan pynsuk tang ïa ki briew ba nabar katba ki trai ri trai muluk kin sa mad ïa shibun ki jingeh bad shah knieh noh ïa kiba bun ki hok kynthup ki kam ki jam.
