Husiar ka ñiah kali bad u bilor kyiad, shah bat bun ki kali kit siej, jan kot 3 lak daiñ kuna ki Pulit

Nongpoh, Ïaiong 10: Ki Pulit jong ka Nongpoh Traffic Police hapoh ka jingïalam jong u Officer in Charge u Rubul Ali ha ka miet sngi Balang ki la bat naphang ïa ki kali kit siej kiba long ka jingma kaba khraw ha ka leit ka wan ki paidbah khamtam ha ka por mynmiet, nalor ka jingbym don ki kot ki sla ba biang, namar katkum ka kyndon aiñ jong ka Motor Vehicle Act, 1988 ki kali ba kit ïa ki mar kim dei ban tam ïa ka met hynrei kumba long mynta ki kali Mahindra pickup kiba kit siej ki pyntam bad dien bad khmat kaba long pynban kum ka jingpynap shrip ïa ki paidbah.
Nalor ka jingbat ïa ki kali kit siej ki pulit ka Nongpoh Traffic Police ki la talasi naphang ruh ïa kiba ñiah kali ryngkat ka dih buaid namar kane ka buh jingma ïa ki paidbah ba leit ba wan ha surok bah khamtam ka jingjur jong ka jingjia aksiden ha kine ki sngi kaba la wanrah ruh shibun ki jingjia ba sngewsih bad wat ka jingduh noh ki mynsiem briew.
Tang hynnin ka miet, namar ka jingbun ki nongpynkheiñ aiñ ki pulit ka Nongpoh Traffic Police ki la ïoh ban daiñ kuna haduh 2 Lakh 99 hajar bad na ka liang ka tnad pulit ka maham ïa ki paidbah ban burom ïa ki aiñ ñiah kali naduh ki ar sha ka, ki kali rit bad haduh kiba heh ban lait na ki jingjia ba sngewsih bad kum ka tnad pulit kan nang pyrkhing bad pynjur ïa ka jingtalasi ïa ki kali nangne shakhmat khnang ba kan long ka jinghikai ïa ki paidbah ba ki dei ban sngewthuh ïa ki aiñ ñiah kali.
Haba kren sha ki lad pathai khubor na ka liang u Rubul Ali Officer In charge ka Nongpoh Traffic Police lem bad u L Ingty SI ki la ong ba ka daw bala pynlong ïa ki ban pynlong ka jingtalasi ka dei namar ka jingjur palat ka aksiden kali ha kine ki khyndiat sngi kaba la wanruh bun ki jingmynsaw bad wat ka jingjia ba sngewsih na ka jingduh noh ki mynsiem briew tang na ka daw ka jingbym burom ïa ki aiñ ñiah kali bad ka jingdih kyiad ha ka por ba ñiah kali.
Ki la ong ruh ba kum ka tnad pulit ka la dep ban ai jinghikai bunsien ïa ki nongñiah kali naduh ki ba ñiah ïa ki ar sha ka bad kumjuh ruh ki kali rit haduh ki kali heh ba ki dei ban burom ïa ki aiñ ñiah kali pynban bunsien ki paidbah kim shym la burom satia kaba la pynlong ïa ki ban pyrkhing tyngeh bad daiñ da ka kuna pyrshah ïa kiba pynkheiñ aiñ bad kyntu ruh ïa ki paidbah ba ki dei ban burom bad kim dei ban pynkheiñ ïa ki kyndon ñiah kali.