Hun ki Paralok ka MDA ïa ka jingpyn shai u CM halor ka Roster System

Shillong, Jymmang 18: Ki paralok seng saiñ pyrthei jong ka NPP kiba don hapoh ka kynhun jong ka MDA ha ka sngi Palei ki la pdiang hun ïa ka jingpyntreikam ka sorkar ïa ka Roster System hadien ba ka u Myntri Rangbah ka jylla u la pynshai bniah ïa ki bin pa bin.
Haba kren sha ki lad pathai khubor hadien ba la kut ka jingïalang ka kynhun MDA, u Myntri Rangbah u la ïathuh ba ïa ba ki jingkylli kiba ki paralok kiba don ha ka MDA ki buh ha kaba ïadei bad ka Roster System ‘ngi la pyni da ki slides bad jubab bin pa bin bad na ka liang ka kynhun hi da kawei ka sur ka hun ïa kaba ngi batai,’ u la ong.
Haba kylli halor ka jingmih ka jingdawa ba ha ka All Party Meeting dei ban ïakren ïa ka Reservation policy bad ka Roster System u Myntri Rangbah u la ong, “Ha ka jingïalang kaba ngi shong hynnin ka sngi Balang, mynta ka sngi Palei bad lashai ha ka sngi Thohdieng ka jingïakren jong ngi kan dei beit thik tang halor ka Roster System ngin ym ïakren eiei halor ka Reservation Policy”.
“Phi hap ban sngewthuh ba ka Roster system ka dei ka rukom ban pyntreikam pura ïa ka reservation policy,” u la bynrap.
Haba ïadei bad ka jingpyntreikam ïa ka Roster naduh u 1972 u Myntri Rangbah u la ong, “Ka jingpyntreikam ïa ka roster ka dei ban pynthikna ba ka reservation policy ba shna ha u 1972 yn pyntreikam pura kaba la wanrah bad kumjuh ruh kumba ka kashari ka bthah ïa ngi bad ka jingpyntreikam ïa ka reservation policy khlem ka roster kam don jingmut.”
Haba kylli la ka jingpyntreikam ka sorkar ïa ka roster system kumba long mynta la ka long ban pynmyntoi tang ïa kawei ka kynhun jaidbynriew, “Kam don kaba kum kata ka jingkwah ban pynmyntoi ïa kano kano ka jaidbynriew hynrei ngi pyntreikam kumba ka sorkar India bad ka Supreme Court ka bthah, ha ka jingshisha dei naduh ka sngi kaba nyngkong ba la pyntreikam ïa ka reservation policy ka roster ka la dei ban treikam,”.