Rah ka Mawlai Presbyterian HSS ïa ka Inter-School Invitational Futsal (Boys) Competition jong ka Seng Khasi College

Shillong, Jymmang 19 : Ka Seng Khasi College kum shibynta ban rakhe ïa u mawmer jong ka jingdap sanphew snem, ka la pynlong ïa ka Inter-School Invitational Futsal (Boys) Competition kaba sdang naduh ka 18 tarik haduh ka 19 tarik Jymmang 2023.
Ha kane ka jingïalehkai, phra tylli ki skul kila wan ban ïashim bynta kiba kynthup ïa ka Christian Academy Higher Secondary School, ka Pearly Dew Higher Scondary School, St. Dominic’s Higher Secondary School, Mawlai Presbyterian Higher Secondary School, Seng Khasi Higher Secondary School, Sacred Heart Boys Higher Secondary School, Government Boys Higher Secondary School bad ka Seng Khasi College (Higher Secondary Section).
Ïa ka jingïalehkai la wan ban pynïaid da ki dkhot jong ka Futsal Dream Team. Ki artylli ki team kiba la ïoh ban rung sha ka final ki kynthup ïa ka Mawlai Presbyterian Higher Secondary School bad ka Seng Khasi College (Higher Secondary Section) ha kaba ka Mawlai Presbyterian Higher Secondary School ka la ïoh ban rah ïa ka nam lahduh. Ïa ka khusnam sha ki lah duh la sam da u Rangbah R. H. Dkhar uba long u Secretary jong ka Governing Body jong ka college bad ha kajuh ka por kum u kongsan jong kane ka lympung ïalehkai.