Shillong, Jymmang 18 : Ka Khasi Jaintia Christian Leaders Forum (KJCLF) ka pynpaw ïa ka jingkmen halor ka jingpynbna jong u Myntri Rangbah ba ka jingïakren ïasuk hapdeng ki Lai Kynhun kaban sdang ha u bnai Jylliew 2023.
Katkum ka kyrwoh ba la phah da u Rev. Dr. Edwin H Kharkongor, Secretary ka Forum la ong, “Ka KJCLF ka ithuh bad burom ïa ka jingjam kaba khraw bad ka jingïaid kaba skhem jong ka HNLC ryngkat ruh bad ki artylli ki kynhun kiba ïadon bynta, bad ka duwai na ka bynta ka jingjop jong kane ka jingpyrshang kaba donkam. Na ka bynta ki nongshong shnong ha ka Jylla, ka jingthrang bad jingwad ïa ka jingsuk ka la long kaba jlan bad kaba thoh dak ha ki bun rukom.”
Shuh shuh u la ong ruh ba wat haba ki la don bun ki jingpruid lynti ha ki snem ba la dep, ka Forum ka kyrmen ba kane ka jingkren ïa suk kaban sa long shen kan wanrah ïa jingkut bad ka jingkdup ban kynthup ïa ka jingsuk, ka hok, ka jingshngaiñ bad ka jingïada ïa ki jaka puta ha ka ri bad baroh ki nongshong shnong jongka.
