Nongstoiñ, Lber, 14: Ka Ïingkashari jong u Special Judge (POSCO) West Khasi Hills, ka la hukum ban set phatok haduh 30 snem ïa u runar u ba donkti ban leh beijot ïa iwei I khynnah ha u snem 2020 hapoh ka Shnong Dalbot, West Khasi Hills.
Ka Ïingkashari ka la pynmih ïa kane ka hukum ha ka 7 tarik Lber haba shong bishar ïa ka Shallang PS Case No 19 (07) 2020 ba la pynngat hapoh ka kyndon 5 (m) 6 jong ka POSCO Act.
Katkum ka hukum, une u runar u dei uba la tip kyrteng u Agustine Momin ba ju khot sin u Rajesh G Momin u dei u ba la leh ïa kane ka kam bymman ha ka 31 tarik Naitung 2020.
Ka Ïingkashari ka la pynngat shong phatok haduh 25 snem ïa une u runar bad ka kuna ba T.30,000 katkum ka kyndon 6 haba buh kyndon ruh ban set along sa 3 bnai lada um lah ban siew ïa ka kuna.
Ka Ïingkashari ka la hukum ruh ban set along sa 5 snem bad ka kuna ba T. 5000 katkum ka kyndon 506 jong ka IPC nalor ka jingshong phatok sa shibnai lada um lah siew ïa ka kuna.
Katkum ka jingpyntip u Superintendent of Police ka West Khasi Hills, ki Pulit ki la kem mardor ïa une u runar mar syn ïoh pdiang ïa ka jingujor bad hadien ka jingtohkit kaba bniah bha, ka Ïingkashari ka la ai ïa ka hukum kaba ïahap bad ka jingpynsajia ïa utei u runar.
