Ka elekshon lah kut ym don lama shuh, ale ngin ïatreilang na ka bynta ka Nongstoiñ: Gabriel Wahlang

Nongstoiñ, Lber, 14: U MLA ba thymmai jong ka Nongstoiñ Constituency Bah Gabriel Wahlang, u la khot la wer sha baroh ki paidbah ka Nongstoiñ Constituency, ban ïatreilang na ka bynta ka bha ka miat, ka shong suk shong saiñ, ka roi ka par bad baroh ki bynta kiba ïa dei bad ban pynkiew ïa kane ka Constituency.
Haba kren sha ki lad pathai khubor ha ïing sah jong u ha Pyndengrei Nongstoiñ, u Bah Gabriel Wahlang u la ong, “Ka por jong ka elekshon ka lah kut bad yn ym don lama shuh jong no jong no. Kumta nga sngew ban pynpaw sha baroh ki nongkyrshan jong nga bad kumjuh ruh sha kito ki nongkyrshan kiba dei na kiwei ki party, lada ka dei ïa ki kyrtong bapher bapher, nga kyntu ba to ngin ïatreilang na ka bynta ka bha ka miat bad ka jingkiew jong ka Constituency baroh kawei”.
“Ha ka jingïaleh hi don tang uwei, kumta ym dei ban thew ïa woh ïa kiei kiei ba la dep, hynrei ban ïatreilang ryngkat na ka bynta ka jingbha ka Constituency. Kumjuh ruh nga khot sha ki nongkyrshan jong kiwei ki party ba to ngin ïatrei ryngkat, khlem donkam shuh ïa ka lama jong no jong no ruh ha ki lynti ïaid jong kine ki san snem ban wan. To ngin rah ïa ka burom ba watla ha ka por elekshon la ïather kylliang ki nia ki jutang. Hynrei, kumba ju long barabor ba hadien ka elekshon, to ngin neh beit ha ka jingïalong kawei para dong para thaiñ”, u la ong.
U la ong ruh, “Ka jingsngewnguh ka long ïa u Blei Trai Kynrad, u ba la pasiaw ha nga ban mih shakhmat ban shakri paidbah lyngba ka kam saiñ hima sima. Nangta, nga ai ka khublei shi hajar nguh ïa ki paidbah baieid jong ka Konstitwensi Nongstoiñ kiba la pynkup ïa nga ïa ka iktiar ban long kum u MLA jong phi”.