Shillong, Nailar 01: Ki nongïalam ka Northeast Students Organization (NESO) hmynta ka sngi ha ka jingïalam u Chairman u bah Samuel B Jyrwa ki la leit sha Manipur ban wad ki lad lynti kumno ban lah wanrah biang ïa ka shong suk shong shngaiñ hapoh kane ka jylla.
Ki dkhot jong ka NESO kiba la leit shapoh ka jylla Manipur ki kynthup ki nongïalam ka Twipra Students’ Federation (TSF), All Arunachal Pradesh Students’ Union (AAPSU), Garo Students’ Union (GSU), Khasi Students’ Union (KSU) bad ka All Assam Students’ Union (AASU), Naga Student Federation (NSF) bad kiwei.
Ha kane ka jingleit sha Manipur, ka kynhun ka NESO kan leit sha ki jaka ba shah ktah ha ki kam ïa umsnam bad kin ïakynduh ruh ïa kiwei ki kynhun sengbhalang jong ka jylla Manipur ban ïakren kumno ban wanrah biang ïa ka shong suk shong shngaiñ hapoh kane ka jylla.
Naka liang ka NESO kan leit ruh ban jurip ïa ki jaka sah ba shipor jong kito kiba shah ktah ha kane ka jingïaumsnam naduh ki Kukis bad Meitei ha Manipur bad kan leit ruh ban kynduh ïa u myntri rangbah bad ïa u Lat jong katei ka jylla.
