Nongstoiñ, Nailur 10: “Ngi wan hangne ym ban ai jingkular hynrei ban ïoh sngew ïa ki jingeh, ki jingduna bad ki jingdkoh jong ka pule puthi ha kine ki thaiñ bad ruh ban pynsngew sha ka Sorkar ïa kine baroh khnang ba ka Sorkar kan leh ei ei”, ong u Prof David R.Syiemlieh nongai buit jong ka State Education Commission jong ka Sorkar Meghalaya, ha ka jingïalang ba la pynlong mynta ka sngi ka 10 tarik u Nailur, 2024 ha Vanni’s Hall St Peter Higher Secondary School, Pyndengrei, Nongstoiñ.
Ha kane ka jingïalang la ïa don lang da ki Deputy commissioner jong ka West Khasi Hills, South West Khasi Hills bad Eastern West Khasi Hills District, ki principal, ki Headmaster, ki Nonghikai nalor kiwei de.
Ki nongïashim bynta ha kane ka jingïalang phylliew jingmut ki kynthup ïa ka jingkren bad jingai jingmut jong ki Deputy Commissioner, ki Principal ki Headmaster, ki Nonghikai bad kiwei kiwei kiba don bynta ha ka pule puthi.
Ki nongïashim bynta ki la ai ïa ki jingai jingmut halor ki jingeh kiba kynthup ïa ka ka um bam um dih sha ki jaka pule, ka light, ki paiñkhana bad kiwei kiwei ki jingdonkam, ki nonghikai kiba la pyntbit bad bym pat pyntbit, ka midday meal, ka jingpep skul, ka jingwan pynrung skul, kajuh ka shuti ïa baroh ki skul Sorkar bad bym dei skul Sorkar.
Nalor kata la pynshai halor ka jingduna jong ki nonghikai bad ki office staff, skul building ki madan ïalehkai ka jingker kynroh, ka jingdon tang kawei ka DIET ne jaka ai jingpyntbit ïa ki nonghikai na ka bynta ki lai District ban pynheh pynbha ïa ka, nalor kiwei kiwei pat.
Kane ka meeting ka long kum ka rynsan ban ïa phylliew jingmut bad ki member jong ka Commission ïa ki jingeh bad jingai jingmut halor ka pule puthi ha kine kine ki thaiñ. Ka Commission kan sa pynpoi ïa kine ki jingeh bad jingïa phylliew jingmut sha ka Sorkar ban leh ïa kaba donkam.
Ïa kane ka jingïalang la pynïaid da ka Prof SM Sungoh shongknor ka State Education Commission bad ïa ka jingkren ai khublei la ïoh na I Deputy Commissioner ka Eastern West Khasi Hills kong M Chandra IAS.
