New Delhi, Nailar 05: Hato ïa ka kyrteng jong ka ri India yn pynkylla noh sha ka Bharat?.
Kane kadei ka jingkylli jong kiba bun, haba ka President jong ka ri India, ka Dhaupardi Murmu, ka la thoh ialade President of Bharat ha ka Invitation Card ba la phah sha ki khlieh nongïalam jong ki ri ban ïashim bynta ha ka G-20 Summit.
Kane ka jingthoh President of Bharat da ka President jong ka ri India, ka la wanrah ka jingïatai kaba jur ha ki Social Media, ha kaba ki nongïalam ka BJP naduh ki MP, ki Myntri Rangbah ki la pynpaw ka jingkyrshan ban pynkylla noh ïa ka kyrteng India sha ka Bharat.
Haba pdiang sngewbha ïa kane, u MP ka BJP, u Harnath Singh Yadav, u la ong ba ka ri baroh kawei ka dawa ba dei ban pyndonkam noh da ka kyrteng Bharat ha jaka jong ka India. U la ong ruh ba ka kyntien India kadei kaba la pyndonkam bakla bad la ai da ki phareng. ‘Bharat’, kadei ka nongmuna jong ka kolshor bad nga kwah ban pynkylla noh ïa ka riti synshar jong ka ri”, la ong u Yadav.
Katba u Myntri Rangbah jong ka Assam, u Himanta Biswa Sarma, haba pdiang sngewbha ïa ka kyrteng Bharat, u la thoh ha Social Media X, ba ju tip mynshuwa kum ka Twitter “Republic of Bharat”.
Katba ki nongïalam ka Congress naduh u Manish Tewari, u Shashi Tharoor, ki la pynpaw ka jingbym sngew ïap ban leh ïa kane. U Tharoor u la ong ba wat lada ka kyntien Bharat kadei kaba la don ha ka riti synshar jong ka ri India, hynrei ka kyrteng India pat kadei kaba la pyndonkam naduh ki phew snem bala leit bad la tip lut ha kylleng ka pyrthei. Kumta ka long ka jingleh kaba bieit ban pynkylla ïa kane. Katba u Tewari pat u la ong ba ka Article 54 jong ka Ritim synshar ka ri India, ka ong “The Republic of India”.
U nongïalam jong ka DMK, u MK Stalin, u la ong ba hadien ba ki Seng bym dei BJP ki la ïatylli lang ban ïakhun pyrshah ïa ka BJP bad ai kyrteng ïa ka kynhun da ka INDIA, mynta pat ka BJP ka kwah ban pynkylla noh ïa ka India sha ka Bharat.
“Ka BJP ka kam ba kan wanrah ka jingkylla ha ki khyndai snem, hynrei kaei kaba la ïohi ka long tang ka jingkylla ki Kyrteng”, la ong u Stalin. U la ong ruh ba i kumba ka BJP ka tieng ïa ka kyrteng INDIA.
U Arvind Kejriwal u la ong ba kaei ba ka BJP kan leh, shu buh lada ki Liang Pyrshah kiba ai kyrteng da ka INDIA ki kylla noh sha ka kyrteng Bharat?.
Katkum ka Riti Synshar jong ka ri India, la ong naduh ba sdang kumne, “The Constitution of India.
Ka Preamble jong ka Constitution ruh ka ong, “We the People of India”..
Hynrei dei ha ka Part I jong ka Constitution haba batai ïa ka jingiadei ka ri India bad ki jylla ba la lap ïa ka kyrteng Bharat, haba ka thoh kumnde, “Name and Territory of the Union- (I) India, that is Bharat, shall be a Union of States”.
Kaba mut mynta lada ka Sorkar pdeng ka pynkylla na ka kyrteng India sha ka Bharat, hap pynkylla ïa ka riti Synshar jong ka ri. Ong ki lad khubor na Delhi ba kane ka mat ruh ka lah ban dei kaawei na ki jingiatai ha ka Dorbar Kyrpang jong ka Parliament ka ban long naduh ka 18 tarik haduh 22 tarik mynta u bnai.
