Shillong, Nailur 05 : U Myntri ka sorkar jylla ba dei ruh u Working President ka UDP, Bah Paul Lyngdoh ha ka sngi Ba-ar u la buh jingkylli ïa ka jingthmu jong ka sorkar pdeng ban pyntrei kam noh da ‘kawei ka ri, kawei ka elekshon’.
Haba kren bad ki lad pathai khubor, u Myntri u la ong ruh ba um pat ïoh ban pule bniah halor ka jingktah jong katei ka jingthmu haba ïadei bad ka bynta jong ka sorkar.
“Tangba, nga sngew ba ha ka Ri kum ka India kaba don lut ki jingïapher, kum ka nuska ka ri kaba la bun haduh katta katta ki jingïapher kaba ngi donkam wat palat ïa kawei ka time zone kumta kumno phin lah ban kren haba ïadei bad kawei ka ri bad kawei ka elekshon,” ong u Myntri.
Shuh shuh u la bynrap ruh da kaba ong ba ha kiwei ki bynta jong ka Ri, ki sdang ban leit trei kham slem lada nujor bad kane ka jylla namar ka sngi ka mih kham kloi sha kane ka thain.
“Kumta, ka United States kadei kawei ka ri hynrei ka don pat la ka jong ka time zone, kumta, nga ngeit ba kata hi ka la jubab lut,” u la ong.
Halor ka jingkylli, u Myntri u la ïathuh ruh ba katei ka phang kadei kaba eh bha hynrei u bynrap pat da kaba ong ba ki ngeit ha ka jingïatylli wat hapdeng bun ki jingïapher bad kumta donkam ban bud ïa kata.
