K a jaidbynriew Khasi wat haduh kine ki sngi ym lahb an len ka dang dei ka jaidbynriew kaba tip briew tip Blei bad kaba bat ia ka hok ka sot ha ka imlang ka sahlang ne ha ki longing longsem.
Ym lah pat ba ha kine ki sngi ka jaid bynriew Khasi ka la sdang ban hiar dor namar ka jingwan tuid ki mynder bad ka jingbud tynneng ïa kiwei pat ki jaid bynriew jong ka pyrthei ha kaba ka akor ka burom ka la hiar dor bad bun ruh ki la sdang ban khein dew thala ïa ka hok ka sot ba la bat naduh ki longshuwa man shuwa.
Wat la katta ruh ngim pat lah pat ban ong ba ka jaid bynriew Khasi ka la lyngkar ne ka la hiar dor namar wat haduh mynta kiba bun hi ki longing ki longsem ki dang bat ïa ka akor ka burom bad ïa ka hok ka sot kum ka jaid bynriew ba tip briew tip blei.
Lada ïa nujor bad kiwei pat ki jaid bynriew jong ka pyrthei ngi lah ruh ban ong ne pynshisha ba ka jaid bynriew Khasi ka dang dei ka jaid bynriew ba tip briew tip blei, namar ha kane ka jylla ba ki jaid bynriew Khasi ki shong ki sah dang niar ban don ki kam ïa pynïap ne ki kam sniew kiba la ktah ïa ka shnongsuk shong sain ki paidbah, namar bun hi ki jingmut jingpyrkhat jong ki Khasi ki dang don kata ka jingtieng burom ïa u Blei bad ba ki dang bat ïa ka akor ka burom bad ïa ka hok ka sot kaba long katkum ka hukum.
Kaba sngewsih pat ka long ba ha kine ki sngi da ka jingïakhleh lang ki jaid bynriew bapher bapher ki kam sniew bad ka jingtieng burom ïa u Blei ka la sdang sting ha kaba bun na ki kam sniew ki la sdang roi katba dang mih ki sngi.
Hynrei ka jingkylli ka mih, hato dang lah mo ban pynlong ïa ka jaid bynriew Khasi kum ka jaid bynriew kaba tip briew tip blei bad kiei ki lad ki lynti ban ïada ïa ka jaid bynriew ba kan tip ïa ka hok ka sot bad ïa ka kyrdan jong ka longbriew manbriew.
Ki kam tuh kam thiem bad ki kam sniew kiba bun rukom ki la sdang roi ha kine ki sngi, hato kane ka jia ym dei mo ba la sting ka longbriew man briew ha kaba ym don shuh kita kiba peit ba kmih ne kiba ïalam lynti ban ïada ïa la ka jong ka jaid bynriew kaba tip briew tip blei.
Ha kawei ka bynta la dei ban ai ka jingïaroh ïa kita ki seng kiba la ioh ban kem ïa kitei ki riew kynthei kiba la leit sha katei ka kam kaba ktah mationg ïa ka jaid bynriew, hynrei kaba sngewsih pat ka long ba ha ka jingshisha ki dei ban ai kata ka jingsneng jingkyntu ki la kloi pynban wat ban thad madan ha ki kot khubor khlem da pyrkhat ïa ka jaid bynriew kaba long hi kum ka jingthad madan ïa laka jong ka jaid bynriew.
Ha ka jingshisha kum ki Seng Bhalang kiba kam ïa lade ba ki dei ki seng kiba pynbha lang ki la dei ban don ka jingiohi jngai haba thad madan ïa kum kitei ki jaid kam, kaei ka ban ktah ïa la ka jong ka jaid bynriew bad kaba sngewsih pat ka long ba kim pyrkhat ïa ka jingsngew jongkitei ki riew kynthei bad khlem da bishar bniah ruh kiei ki daw ba la pynlong ïa ki ban kin leit sha kum kitei ki jaid kam kiba pynpoh shisha ïa ka longbriew manbriew bad wat ïa ka jaid bynriew.
Ka jingkren jong ki riew pyrkhat ruh ka ong, “Ban bakla ka dei ka jinglong briew” bad ba ngim juh dei ban peit tang ïa kiwei namar ngim tip ba u khung uba kham heh u don ha ki khmat lajong. Dei namar kane ka daw haba ngi shem ïa ka jingbakla jong kiwei ym da kaba thad madan ne ban pynpaw pyrthei hynrei ki lad ban ïada ki dei ban long da ka jingsneng jingkyntu khnang ba kita kiba la bakla ha ka jingïaid lynti ruh kin sngewthuh ïa la ka jong ka jingbakla.
Namarkata, ka la dei ka por ba kum ki nongïalam ne ki riew pawkhmat ba kin shim ïa ka jingkitkhlieh ban ïada ïa la ka jong ka jaid bynriew bad ban pyni da ki lad ki lynti ban tem ïa kiba bun ki jingsniew ha ka imlang ka sahlang, khnang ba ka jaid bynriew Khasi kan nym shah rkhie bein ha kiwei pat ki jaid bynriew jong ka pyrthei.
Shuh shuh, kum ki nongïalam ne ki riew rangbah ki la dei ruh ban p yrkhat arsien haba don kino kino ki kynrum kynram ha ing hasem ne ha ka imlang ka sahlang ban kiar na ka ba thad madan, namar kane ka ïalam sha ka jingjah burom jong ka ing ka sem ne ka jaid bynriew hi baroh kawei. Hynrei ka lad kaba kham bha ban tei ïa ka jaid bynriew ka dei ban long da kaba pyni ïa ki nuska bad ryngkat ki jingsneng jingkyntu kaba lah ban pynsngewthuh ïa baroh kiba leh ïa kikam kiba ym lah ban pdiang ha ka imlang ka sahlang.
