Hapoh 1 bnai kwah ki paid Hima Sohïong ban ïoh Lyngdoh thymmai

0

Shillong, Jylliew, 21: Ka Joint Action Committee ki khun ki hajar ka Hima Sohïong ha ka sngi Thohdieng ka la kyrpad ïa ka Khasi Hills Autonomous District Council ban pyndep noh hapoh shi bnai ïa ka jingjied ïa u Lyngdoh bathymmai jong ka Hima Sohïong.
Ka Executive Committee jong ka Khasi Hills Autonomous District Council ha ka 14 tarik, Jylliew, 2024 ka la pynmih ïa ka jingpynbna sha ka Hima Sohïong baroh kawei hadien ka jingkhmih bniah ïa ka kaiphod tohkit jong u Inquiry Officer la shem ba u Bah Banshemphang Thabah u la pynkheiñ ïa ka Section-6 jong ka United Khasi and Jaiñtia Hills Autonomous District (Appointment and Succession of Chief and Headmen) Act, 1959. Ha kane ka jingpynbna u Deputy Secretary jong ka Executive Committee ka Khasi Hills Autonomous District Council u la pyntip ba la weng noh shi syndon ïa u Bashemphang Thabah kum u Lyngdoh jong ka Hima Sohïong katkum kane ka kyndon.
Ïa mynta ïa ka synshar ka khadar hapoh ka Hima Sohïong la peit bad pynïaid da u Acting Lyngdoh.
Ha ka jingïakren bad ki lad pathai khubor u Bah Purningstar Shabong uba dei u Chairman jong ka JAC ki khun ki hajar ka Hima Sohïong u la ong ba ka jingjied ïa u Lyngdoh ba thymmai jong ka Hima Sohïong ka dei ban long da ki khun ki hajar jong ka Hima Sohïong ym shuh da ki Saw Lyngdoh kumba ju long ha ki snem ba la leit noh.
“Ngi sngewthuh lada ym don hi u Lyngdoh bapura ka lah ban buh jingeh ïa kiba bun. Ka jingdon jong u Acting Lyngdoh um lah satia ban weng ïa ka jingeh jong ki khun ki hajar ka Hima. Dei na kata ka daw ngi kwah ba ka District Council kan pynkloi ban buh tarik bad ban pynbna noh kham kloi ïa ka elekshon jied Lyngdoh hapoh ka Hima Sohïong,” u la ong.

Leave A Reply

Your email address will not be published.