Shillong,Kyllalyngkot 2 : Lada hapdeng sor ruh ka tnad PWD kam shim khia ne ïohi ïa ka jingsniew jongka surok katno tam lei sha ki thaiñ nongkyndong haba sniew surok hap ïai shah da ki snem snem lynter.
Kane ka surok ka dei kaba na lum Survey ne Butcher Road ba rung na Lad Umsohsun bad mih shajan Rhino kaba la sniew haduh katta katta ha kaba naduh ki kali saw shaka haduh ki kali ar shaka ruh ki la shem jingeh ban ïaid lyngba.
Ka long kawei na ki surok kaba ïarap ban pynduna ka jingdheng kali sha ki thaiñ Police Bazar namar ki briew kiba leit donkam da ki kali sha ki thaiñ Laban, Bishnupur, sha Laitumkhrah, sha ki thaiñ Upper Shillong bad kiwei kiwei ki jaka bunsien ki pyndonkam beit lyngba kane ka surok.
Khlem pep wat ki heh sorkar naduh ki myntri sorkar haduh ki ophisar ruh ki pyndonkam lang ïa kane ka surok hynrei mynta la katto katne bnai kane ka surok ka neh beit kumjuh khlem kano kano ka jingpynbha ne maramot ïa ka.
Ki paidbah kiba leit ba wan na kane ka surok ki la ud la nam bha halor kane ka jingsniew kane ka surok bad ki kyntu jur ïa ki bor ka tnad PWD kiba dei peit ïa kane ka surok ban shim khia ban phah maramot noh ïa ka khnang ba ka leit ka wan ka ïaid ka ïeng ki kali kan suk khlem kino kino ki khoh ruh khoh ram.
