Hap shu sngap ïa ki jingkyrpad u PM ban tyngkan ïa ki jingpynlut phut ïa ka Petrol : Kharkrang

Shillong, Jymmang 15 : Namar ka jingkiew dor ka umphniang ha baroh kawei ka pyrthei namar ka thma ha Middle East, u Nongaiktien ka Meghalaya BJP Bah M Kharkrang ha ka sngi Thohdieng, ula ong ba ki” jinglong jingman ki long palat ïa u pud ba lah ban leh ei ei ka Delhi” bad kaba kongsan ka long ban kyrshan ïa ka jingkyntu u Myntri Rangbah Duh Narendra Modi ban kham tyngkan ïa ki jingpynlut ban lah pynneh ïa ka foreign exchange (jingbujli pisa).
“Ka Sorkar ka la pyrshang ban tehlakam ïa kano kano ka jingkiew dor ha ka dor petrol sha u pud ba ki kompani umphniang ki la mad ïa ka jingduhnong ba kot da ki hajar klur man ka sngi bad ka por kan sa poi ba kin ym lah shuh ban kyrda ïalade” ong u Bah Kharkrang.
Ula pynpaw ba kane ka jingkiew dor ka umphniang ka dei ka jingeh bala mad da ka pyrthei baroh kawei. “Kane ka dei ka jingeh ba la mad da ka pyrthei baroh kawei bad nga sngew ba ngi hap ban pdiang ïa ka” ula ong.
“Kaei kaba jia ha Middle East ka long palat ïa u pud ba lah ban leh eiei da ka Ri bad ka Sorkar Pdeng. Kum kine ki kam ki ju ktah beit. Ngi hap ban ïai shah bad ka” ula ong.
Haba kyntu ïa ki paidbah ban ïatreilang, ula bynrap “Nga kyrmen ba ki paidbah ruh kin shah skhor bad shim ïa ki lad ki lynti ban tyngkan ïa ka jingpynlut kiba u Myntri Rangbah Duh ula kyrpad ïa baroh ki nongshong shnong jong ka ri khnang ba ngin lah ban khang ïa ka jingbujli pisa (foreign exchange) ba kan mih na ka Ri bad kat kaba don ka Foreign Exchange kan neh beit hapoh ka Ri”.
“Kane kam dei halor ka Sorkar Pdeng ne ka Sorkar BJP lane kano kano ka Sorkar. Kum ka Ri. Kum ka Ri ngi hap ban ïai shah ïa kane bad ngi hap ban ïakhun lang” ong u Bah Kharkrang.
Halor ka jingpynkut ïakane ka jingeh, ula ong “Baroh ki kwah ba ka thma kan kut noh. Baroh ki Ri kiba ieid ïa ka jingsuk kin kwah ba kane ka thma kan kut noh namar ka ktah ïa ka khaïi ka pateng, ka ïoh ka kot jong baroh ki Ri ka pyrthei. Ka Sorkar Pdeng ka hap ban shim ïa bun ki sienjam. Tang kawei ka lynti kaba nga ïohi ka long ba kane ka thma ha Middle East kan sangeh noh”.
Haba pynshai ïa ka jingai jingmut u Myntri Rangbah Duh ban trei na kano kano ka jaka ba ïadon, u Bah Kharkrang ula og “Kat kaba lah kam dei kaba ngi ong ban trei na ïing hynrei na kano kano ka jaka, ngi lah leh ïa kane ha ka por jong ka khlam Covid bad u (PM) u khlem pynbor hynrei ula ong ba kat kaba lah. Hooid, ki nongbylla kin ym lah ban trei na ïing hynrei ki don bun kiwei ki kam kiba lah ban trei na ïing”.