Shillong, Nailur 13 : U Myntri Rangbah ka Jylla Conrad K Sangma, ha ka sngi Balang ula ban jur ba ka Sorkar jong u, ka la buh ïa ka kam pule dangle ha ka lynti ka jingpynbeit bad pynjanai hadien ba la pynïaid lyngba ki kynrum kynram kiba bun khlem da bud ïa ki nongrim ba la pynkhreh ha 50 snem mynta.
Haba kren ha ka jingïalang pyndap pyrda ïa ka jingrakhe dap 100 snem ba la pynlong shisnem lynter jong ka Laban Bengali Higher Secondary School, u Myntri Rangbah ula ong ba rukom pyntreikam ïa ka kam pule dangle (Education System) kala ïaïd lait na ki nongrim ba la thmu kaba dei ka bha ka miat bad ka lawei jong ki Khynnah pule, ha kine ki 50 snem bala leit noh.
“Hynrei ka Sorkar jong nga, kan pynthikna ba baroh ki rai ba la shim kan buh hakhmat eh ia ka bha ka miat jong ki samla pule” ula ong.
“Nga lah ban ong da ka jingsngewshkem ba ka kam pule dangle ka dei kawei na ki kam ba hakhmat eh jong ka Sorkar bad ka Sorkar ka la wanrah ïa ka policy jong ki khynnah pule ban pynbiang ruh ïa baroh ki jaka pule hapoh ka Jylla” ong u Conrad ha ka jingïalang kaba la ïashim bynta ruh da u Myntri ka kam Pule Dangle u Rakkam A Sangma.
Haba kren halor ka jingbun jyrwit jyrwat bad kynrum kynram ha ka kam pule dangle ha Meghalaya, u Conrad ula ong ba ka Jylla ka don ïa palat 55000 ngut ki Nonghikai bad jan kot 15000 tylli ki skul bad jaka pule. “Ki jingeh ban pynïaid ïa ki skul ha ryngkat ka jingbym biang tarajur hapdeng ki Nonghikai bad ki Khynnah, katto katne kiba don tang khyndiat ki khynnah hynrei bun ki nonghikai bad don ruh kiba bun ki khynnah bad khyndiat eh ki nonghikai, ka dei kawei na ki jingeh kiba don ha ka kam pule dangle ha Jylla”.
“Kane kan pynbor ïa ka Sorkar ban hap shim ïa ka rai ba tyngeh ha ka ban pynïaklop lang noh lane khang noh ïa ki jaka pule ki bym treikam” ong u Conrad haba bynrap “Kila don bun ki jingkylla hapoh ka Tnad Pule Dangle ha kine ki san- hynriew snem ba la leit noh bad kine ki jingkylla ki dei eh na ka bynta ka bha ka miat jong ki khynnah pule”.
U Myntri Rangbah ula ong “Ka song pisa ka Sorkar ba la mang sha ka pule ka dangle hateng la ju pyndonkam bakla noh tad haduh kine ki snem ba la leit noh hynrei mynta ngi la bthah ïa ki ban shna pynbha noh ïa baroh ki jingtei jong ki skul Sorkar”.
U Conrad ula pyntip ruh ba ka song pisa ba la lum na ka bynta ka pule ka dangle ka la nang kiew ha ka jingbym pyndonkam tad haduh u snem 2019 bad bynrap ba kane ka Sorkar ba mynta ka la bthah ban pyndonkam ïa kane ka song pisa ba la lum ha ka dur jong ki khajna, sha ki kam maramot bad shna ïa ki jaka pule ki ban pynmyntoi shikatdei eh ïa ki skul ka Sorkar ha kylleng ki jaka jong ka Jylla.
U Myntri Rangbah ula kyntu ruh ïa ki Khynnah skul ba kin long kiba adkar bad bat por bha ha ka jingpule haba ban jur ïa ka jingkongsan ha ka jingim shimet bad ha ka trei ka ktah bad bynrap ba ka jinglong adkar bad batpor ka long kaba kongsan bha ha ka jingim naba ka por dei ka spah bakor.
Haba kren halor ka NEP-2020, u Myntri Rangbah ula kren bniah bha halor ka jingdonkam ba ki College kin tyrwa ïa ki jingpule ha ki course bapher bapher, ban thung shuh shuh ïa ki nonghikai bad ki jingtei ha kaba ka pisa kaba donkam baroh kan kot haduh T. 400-500 klur.
U Myntri Rangbah ula shim kabu ruh ban pynbna ïa ki katto katne ki project kam pynroi ban sa pyntrei ha Jylla kynthup ïa ka Secretariat ba thymmai, ki Parking Lot, ki Community park, ki Ropeway System haba pyntip ba ka Sorkar ka la kut jingmut ban wanrah ïa ki kam pynroi ha baroh ki liang nalor ban ai jingkyrshan ïa ki kynhun bapher bapher ha ka imlang sahlang ba kynthup ïa ki Nongrep, ki Seng Kynthei bad ki Nongsengkam sengjam.
Haba pynkynmaw ïa ki kyntien u (L) PA Sangma haba ai jingkren, u Myntri ka kam Pule Dangle Rakkam A Sangma ula ong ba ka spah bah lane ka nongkynti kaba ngi lah ban ai sha la ki Khun ka dei ka jingnang jingstad. “Ka Jingnang jingstad ka dei kaba spah ba kordor tam ba ngi lah ban ai sha ki Khun, ka Jaidbynriew bad ka Ri bad nga ngeit ba ha kine ki 100 snem ba la leit noh, kane ka skul ka la lah ban leh ïa kane na ka bynta ki hajar ngut ki briew kiba la bat ïa ki kyrdan bapher bapher ha ka imlang sahlang”.
Shuwa kane, u Myntri Rangbah ula pynkup burom ïa ki Khynnah ka Skul kiba wan shakhmat eh ha ki eksam ka MBOSE bad pyllait ruh ïa ka jubilee souvenir bad ka kot ba la pynbeit da u President ka Managing Commttittee jong ka skul.
