Hap die duh u parad ïa ki jingdon jingem ba ban ka jingshitom saw snem kynthih

Nongstoiñ, K’lyngkot 29: Ka jingban jong ka jingpang jingshitom ka pynlong ïa ki long ïing long sem ba ki hap ban ïaleh katba lah ban thaw ki buit ki lad ban phah sumar tang ban ïoh jingkoit. Na ka bynta ka bai dawai dashin bad ka bai sumar ki hap ban die wat ïa ki jingdon jingem kum ki khyndew ki shyiap, ki jingri jingdup bad kiwei kiwei.
Ha kaba ïadei bad ka jingban jong ki jingshitom u parad Spendro Sohshang u ba la hynñiewphew khyndai snem ka karta, uba shong ba sah na ka shnong Lawse West Khasi Hills u la ïoh ïa kawei ka jingshitom kaba khyllah kaba shu pynkhynñiuh ïa ka met jong u baroh shi rynïeng, kat haduh ba ym long shuh wat ban bat ïa ka pliang ja ruh.
Haba kylli la u la leit phah sumar ne em ha ki hospital u la ong ba naduh ba u la sdang kem pang, u la leit phah sumar haduh shi snem kynthih ha NEIGRIMS ha Shillong, ha kaba ki doctor na katei ka hospital ki la pynshai ba ka dei ka jingshitom ha u dohnud (liver). Hynrei ka jingshah sumar kam shym la ïarap satia.
Utei u parad u la ong ka smart card u la don, Adhaar card u la don hynrei ka pisa ba siew ka sorkar lyngba ka MHIS ka la lut hynrei u dang ïaleh ban phah sumar da kaba die lut ïa ki jingri jingdup kum ki masi, ki blang bad wat ïa ki kper ki phrah ruh tang ban ïoh bai dawai.
Ha kajuh ka por u la ong ba ki jingri jingdup mynta ki la lut khoit bad ka pisa ba u la ïoh ka la lut ha kaba phah sumar. Hynrei katei ka jingshitom ka nang jur pynban bad u hap ban leit phah sumar noh tang teng teng haba ki don kiba wan ïarap isynei lem.
Haba kylli pat ba mano ba sumar ïa u haba u shitom kumtei, u la ong ba ka lok jong u ka la khlad la slem bah bad u shong u sah bad ka khun kynthei jong u. Nalor kata u la ong ruh ba u don lai ngut ki khun kynthei, hynrei haduh mynta kim pat shong kurim bad ar ngut na ki khun kynthei ki la hap ban leit shong ïing briew tang ban ïoh bai dawai bad phah sumar ïa u. Haba kylli pat ba na ka liang ki briew sorkar ki la wan ïakynduh ne em ïa u ban ai jingïarap u la ong ym pat don satia haduh mynta.