Halor ka nongrim jong ka Sixth Schedule, kular u Bah K.L. Pariat ban trei ha District Council

Jowai Rymphang 01: U ma Khroo Lamsalanki Pariat kum u kyrtong shimet (IND) na ka Jowai North Constituency, hadien bala dep ban thep kyrteng ïalade ha ophis u Deputy Commissioner Jowai, ula ong ka jingmih shakhmat jong u ban ïakhun ïa kane ka Election ka long halor ka nongrim bad ka jingkitkhlieh ba hakhmat eh ïaka bor jong ka ‘Sixth Schedule’ kaba la dep ban pynkhamti daka Constitution jong ka Ri India.
Da kaba ong “ka Sixth Schedule bala pynkup bor hapoh ka District Council ka long ban ïada bad pynim biang ïa ka riti ka dustur, ka jait ka kynja, ka khyndew ka shyiap bad ka kamai kajih jong ki trai jylla”.
Kum u kyrtong ula shim ïa kane ka lyngkor ban pynim biang ïa ka District Council kaba long u klongsnam jong ka jait bynriew, namar haduh mynta ka Council kam pat lah ban shna ïa ka aiñ ban shim jait na ka kmie bad ban ïada ïa ki wah hapoh ka Council kum ka Wah Myntdu, ka Wah Myntang, ka Wah kupli bad ka Wah Mynngot kiba la sdang ban shah pynjulor.
Ula ong wat ka ïew ka hat kala hiar bha mynta namar ka jingwan ki Company ba heh kiba dei trai da ki bar jylla bad kane ka lah ban ktah ïa ki trai ri trai muluk. Wat ki nongtrei jong ka Council mynta kila hap ban shim da ka ram ban pyndap ïa ka ïing ka sem la pynsngew u ma Pariat.
Ula khot ïa ki paidbah nongkyrshan jong ka Jowai North ba kin mih shakhmat ha kane ka Election ban pyndep ïa ka hok thep Vote haka nongrim jong ka jingstad ban jied ïa u nongmihkhmat MDC uba dei hok ban pynthymmai noh.
Ula kyntu ïa ki baroh nongthep vote ka Jowai North ba kin jied ïa u da kaba bishar bniah ïaka jingim bad ki kam kiba ula leh kum u nongtreimon sngewbha. Ha kajuh ka por u don ka jingangnud ban rad diengkhong ïa ki kam sniew naduh ka kyiad bad u drug kiba pynjot ïa ki khun samla.Kum u kyrtong u don ka jingsngewskhem ban jop ïa kane ka Election namar kiba bun ki longkmie, ki khun samla kila wan shakhmat ban pynpaw ban ïohi noh ïa ka jingkylla ha ka synshar khadar.