Mawkyrwat, ‘Naiwieng 16: Ka Hynñiewtrep Integrated Territorial Organisation (HITO) jong ka South West Khasi Hills District ha kine ki khyndiat sngi da ka jingsngewkhia ka la leit ban ïa kynduh ïa ka Branch Manager jong ka Meghalaya Rural Bank (MRB), Mawkyrwat Branch ban pynsngew ha ka ïa ki jingeh jong ki paidbah ba ki ju ïa kynduh ha kaba ïa dei bad ki kam hapoh kane ka Bank bad ban kyrpad ruh ban nang pynbun ïa nongtrei.
Ïa kane ka jingleit ban ïakynduh, la lam khmat da Paul Thyrniang, President bad bah H. Marshal Ramsiej, Secretary jong ka Hynñiewtrep Integrated Territorial Organisation (HITO) jong ka South West Khasi Hills District. Ha ka jingleit jong ki ki la rah ïa ki jingeh ba ki paidbah ki ïa kynduh bad kumjuh ruh ki kyrpad ba na ka liang jong ka Branch Manager kan pynsngew ha ki bor ba halor ban nang pynbun shuh shuh ïa ki nongtrei ha kane ka Bank.
Sa kawei de ki la buhr uh ka jingkyrpad ba na kane ka branch ka la dei ka por ban pynkha shnat treikam sa ha kiwei pat ki jaka hapoh jong kane ka thaiñ Mawkyrwat bad ruh ha ki thaiñ Ranikor khnang ba ki briew kiba ju pyndonkam ïa kane ka Meghalaya Rural Bank kin ymduh ïa ki sngi ki por ban wan pyndep ïa ki kam kiba ïa dei bad ki kam Bank namar ba bun ki briew kiba wan donkam ha kane ka jaka bunsien kim lah ban pyndep ïa ki kam tang ha ka shi sngi tang namar ka la khapngiah shaba palat na ka daw ka jingbun briew, bad kane ka pynduhnong shibun ïa ki paidbah bad ka ktah ruh ïa ka leit ka wan khamtam ïa kiba na jngai ki shnong.
“Haduh mynta kum kane ka jaka treikam ne ka Meghalaya Rural Bank ka dang don tang kawei”, ong ka kyrwoh na ka seng HITO. Namarkata, halor kane ka bynta na ka liang ka Branch Manager jong ka Meghalaya Rural Bank ka la kular ban ïa trei ryngkat bad ha kajuh ka por kan sa phah ruh ïa ka shithi jong ka seng sha ki bor ba hakhlieh jong kane ka shlem treikam ne u chairman uba dei peit ïa kane ka Mawkyrwat Branch.
