Srinagar, Risaw 11 : U Myntri Rangbah ba shah jied ban shimti kum u nongïalam ha ka sorkar ba thymmai u Omar Abdullah ha sngi Thohdieng u la leit ban kynduh ïa u Lieutenant Governor, u Manoj Sinha ban thaw ïa ka sorkar ba thymmai kaba tip kum ka National Conference – Congress ha katei ka Union Territory.
Ha kane ka jingïakynduh bad u LG, u Abdul u la aiti ruh ïa ka shithi jingkyrshan na ki seng sainpyrthei bapher kiba pynpaw bakin kyrshang lang ïa kane ka sorkar bathymmai hadien ba ka Congress ruh ka la phah lang ïaka jingkyrshan ïa u vice president ka NC.
U Abdullah u la shah jied da ka wei ka sur kum u nongïalam jong ka kynhun National Conference ha ka sngi Palei, bad kane ka la plie lad ïa ka samoi kaba ar jong u kum u Myntri Rangbah ka Jammu -Kashmir.
Ka sien kaba nyngkong eh kaba u shimti kum u Myntri Rangbah ha ka sorkar synrop jong ka NC Congress kadei ha u snem 2009 haduh 2014.
Lah ban kdew hangne ba ka NC ka la jop haduh 42 seat na ki 90 seat ha ka elekshon kaba long ha ki lai tylli ki kylla katba ka kynhun ba trei lang ka Congress ka la jop hynriew tylli.
Watla kitei ki ar tylli ki party ki la jop bun eh ha kane ka iing dorbar thawain ba 95 ngut hynrei ki don ruh saw ngut ki MLA shimet bad uwei u MLA ka AAP kiba la kyrshan lang ïa kane ka kynhun NC.
Haba ïakren bad ki lad pathai khubor hadien ba u la dep kynduh ïa u LG ha Raj Bhavan, u Abdullah u la ong ba u la kyrpad ïa u Lat ba un buh ïa ka sngi ban bam smai ïa ka sorkar thymmai katba lah.
“Nga la ïakynduh ïa u Lat bad nga la ai ïa ki shithi jingkyrshan na ka seng NC, Congress, CPI(M), AAP bad ki Independent kiba la kyrshan ïa ka NC. Nga la kyrpad ïa u ba un buh noh kham kloi ïa ka tarik khnang ba ka jingpynbam smai kan long noh khnang ba ka sorkar ba la jied da ki paidbah kan sdang noh ban treikam,” la ong u Abdul.
Shuh shuh u ong ruh ba ka jingpynbam smai ïa ka sorkar ba thymmai kan long la kumno kumno ha ka sngi Balang.
“Kane ka kam kan shim por katto katne por. Kam dei satia ba ka sorkar ba ka sorkar ba thymmai kan bujli ïa kawei pat ka sorkar ba la jied. Kane ka dei ka kyndon jong ka sorkar pdeng, ngi dei ka Union Territory bad u LG u hap ban pynkhreh ïa ki kot ki sla bad ban phah sha Rashtrapati Bhavan,” u la ong.
U Abdullah u la ong ba na Rashtrapati Bhavan ki kot ki sla kin leit sha ka tnad Home Ministry ha kaba kin pynbiang ïa ki kot ki sla bad phah biang pat sha u LG.
“La ïathuh ïa ngi ba kan shim por ym duna ïa ka ar-lai sngi. Nga kyrmen ba lada ïa kane ka kam lah ban pyndep kloi tam, te ka jingpynsmai kan long ha ka sngi Balang,” la bynrap biang u Abdullah.
