Haduh u 2011, don palat 44 hajar ngut kiba don jingthut ha ki dkhot met ha Meghalaya

Shillong, Jymmang 16 : Ka jylla ka don palat 44hajar ngut ki nongshong shnong kiba don jingthut ha ki dkhot met ha ki rukom bapher bapher tad haduh u snem 2011, kata ha ki 11 snem mynshwa.
Katkum ka jingïathuh da ka Commissioner Commissioner for Persons with Disabilities, ka SB Marak na kitei ki 44hajar ngut, kumba 60 persen ki la ïoh ïa ki ‘Card’ ba la ju tip kum ki Unique Disability ID (UDID card).
“Dang don bun ki kam kiba ngi hap ban leh ban ïoh pynpoi lut sha baroh kito kiba dei hok ban ïoh”, ka la ong haba kren bad ki lad pathai khubor ha Shillong Press Club ha kane ka sngi Nyngkong.
Na ka lïang ki nongïalam jong ka National Institute for Empowerment of Persons with Multiple Disabilities (NIEPMD), Chennai haba bynrap lang ki la ïathuh ba dang nyngkong ki don tang 7 tylli kita ki dak kiba ithuh kum kiba don jingthut ha ki dkhot met, hynrei mynta pat ki la don haduh 21 tylli. Ki la ong ruh ba ha ka census kaba thymmai kan pyni ba kin dang don bun kito kiba don jingthut ha ki dkhot met namar la nang kyntiew shuh sa kumba lai shah.
Lah ban kdew hangne ba katei ka Centre ka treikam hapoh ka jingkhmih jong ka National Institute of Empowerment of Person with Multiple Disabilities (NEIPMD), Chennai kaba hap hapoh ka Department of Empowerment of Person with Disabilities, Ministry of Social Justice & Empowerment ka Sorkar Pdeng.
Na ka liang u Director ka NIEPMD, Chennai, u Nachiketa Rout u la ong ban ïoh pyntreikam hok pura ïa ki hok na bynta jong kitei ki parabriew donkam ka jaka treikam kaban peit lang ïa baroh ki jait jingthut ha ki dkhot met, la ka long kiba don jingthut ha ka bor pyrkhat, bor ïohsngew, bor kren bad kiwei kiwei.
“Ïa kine baroh donkam ban peit hapoh kawei ka Composite Regional Centre. Ngi sngew sarong ban pyntip ba kawei na kine ki CRC kan don ha nongbah Shillong,” u la ong da kaba pyntip ba ka sorkar Meghalaya ka la ai ïa ka jaka kaba haduh 10akar na ka bynta ban shna ïa ka jaka treikam kaba pura ha New Shillong.
Shuh shuh u ong ruh ba ha katei ka Centre, ka ai shibun ki jingshakri ïa ki briew ba don jingthut ha ki dkhot met ba kynthup naduh ka jingai jinghikai kaba kyrpang ha ka pule puthi, ka jinghikai ban treikam lajong, ban ai ka jingïasyllok nalor kiwei kiwei katkum ka jingdonkam jong ki. La ong ruh ba ka Centre ka ju sam ruh ïa ki tiar ba ïarap ïa kito kiba donkam lyngba ka skim ADIP .
Ïa ka jingtreikam jong katei ka Centre kaban peit kyrpang na bynta kitei ki para briew ba don ka jinglong ba kyrpang yn plie paidbah da u Myntri ka tnad Social Justice & Empowerment (MSJ&E) ka sorkar pdeng, u Dr. Virendra Kumar na nongbah Delhi. Yn donlang ruh ha kane ka sngi naduh ka Myntri Khynnah ka tnad Social Justice & Empowerment ka Pratima Bhoumik, u Myntri ka tnad Social Welfare ka Jylla Bah Kyrmen Shylla, bad kiwei kiwei.