Haduh T. 15,000 shi hectare ai ka sorkar jylla ban pynneh ïa ki tyllong um
Pan 600 klur na ka sorkar pdeng ban pynkhuid ïa ki wah
Shillong, Risaw 20 : Ka sorkar jylla lyngba ka tnad Water Resources ka ai haduh 15,000 tyngka shi hectare na ka bynta kito ki nongshong shnong kiba pynneh pynsah ïa ki tyllong um.
Haba pyntip ïa kane ka skim, u Myntri ka tnad Water Resources, Bah Comingone Ymbon u la pynpaw ruh ïa ka jingsngewdiaw halor ka jingjur palat ka jingkyntur pud ki paidbah ban shna ïing shna sem sha jan ki tyllong um lane shajan ki wah.
Shuh shuh u ong ruh ba ka sorkar ruh ka buh hakhmat ban peit ba ki tyllong um kin ym shah ktah wat haba wan ki kam pynroi ruh hynrei ban pyntikna ban ïada bad pynneh ïa ki.
“Kane ka jingai 15,000 tyngka na bynta shi hectare ban ïada ïa ki tyllong um ka long ban pynshlur ïa ki nongshong shnong ba kin pynneh ïa ki khlaw ki btap bad ki sawdong sawkun,” u la ong haba kren bad ki lad pathai khubor.
U Myntri u la pynpaw ruh ïa ka jingsngewkhia halor ka jingshna ïa ki ïing ki sem lane kiwei ki jingtei hajan ki ki rud wah la ka long ha ki bynta jong ka wah Umïam bad ruh ka wah Umkhrah. “Balei ha Wah Umkhrah man ka por ka don beit ka jingshlei um, ka daw ka long ba ki paidbah ki kyntur pud sha ka jaka ïaid jong ka um,” u la bynrap shuh shuh.
Halor ka jingkylli, u Myntri u la pyntip ruh ba haduh mynta ki dang ap ïa ka jingmang pisa na ka sorkar pdeng na ka bynta ban ïada ïa ka Wah Umkhrah bad ruh ban pynkhuid ïa ka. Katkum ka jingïathuh jong u, ka sorkar ka la pan haduh 600 klur na bynta ban pynkhie im ïa ki wah hynrei haduh mynta kim pat ïoh satia.
“Hynrei, sngewsih ba ka sorkar pdeng haduh mynta ka khlem pat mynjur,” u la ong da kaba bynrap ba hadien ba u pyrshang ban wad jingtip na ka Ministry la pyntip ïa u ba ka daw ka long ba katei ka pisa ka la heh palat na bynta ka Meghalaya ka jylla kaba rit.
Na ka liang u Myntri u la pynpaw ruh ba ka long kaba eh haduh katta katta na ka bynta jong ki ban pynkhuid ne ban pynkhie im biang ïa ki wah lada kim ïoh ïa ka jingkyrshan na ka sorkar pdeng. “Ka long kaba eh ban pynlut hi na ka sorkar jylla nadong shadong na ka bynta ban pynkhuid ïa kitei ki wah namar ka jinglut kam dei shuh kaba dang khyndiat,” u la bynrap biang.
Hynrei u la ong pat ba ka tnad kan ïai bteng ban buddien bad phah ïa ki jingtyrwa sha ka sorkar pdeng na ka bynta ban ïoh ïa ka jingkyrshan lang na ka sorkar pdeng.