Haduh 8 ngut ïap na ka jingbthei hajan Red Fort, ingkhong ki kali mynsaw bun ngut

New Delhi, Naiwieng 10 : Ka jingbthei kaba jur ha ka janmiet sngi Nyngkong ka la pynjulor phum ïa kawei ka kali kaba pynieng hajan Red Fort metro station haduh ba ka la wanrah ïa ka jingduh ei jong kiba bun ki mynsiem briew nalor ka jingjulor kaba la jur ïa kiwei pat ki kali kiba pynieng hajan katei jaka.
Tad haduh ba thoh ïa kane ka khubor la ong ba ki la don haduh 8 ngut ki briew kiba ïap bad kumba 24 ngut kiba mynsaw ha kane ka jingjia kaba la jia ha ka janmiet kaba dang bun bha ki briew ha katei ka jaka. Ïa kine kiba mynsaw la pynkit mardor sha ka LNJP Hospital kaba don katto katne kilometer na katei ka jaka.
Mar ïa jia kane ka jingjia, la pynjari da ka jingtip paidbah bad ki la don ruh haduh 10 tylli ki kali pynlip ding kiba la pynher sha ka jaka ryngkat ki pulit kiba la ker kut sawdong ïa ka jaka ba jia, ong ka Delhi Fire Services.
Na ka liang ki bor sorkar ki la ïathuh ba ïa kane ka jingjia la lah ban teh lakam mardor hapoh ka 7.29 baje janmiet.
La ïathuh ruh ba ki don hynriew tylli ki kali, ar tylli ki erickshaw bad kawei ka autorickshaw kiba la shah bamduh ha ka ding, ong ka khubor na ka Fire Department.
Mardor na ka kynhun jong ka National Investigation Agency (NIA) ki la poi ha katei ka jaka.
Ka khubor ka ong ruh ba ka jingbthei ka la long kaba jur hdauh katta katta ha kaba wat ki kali kiba don hajan ki la pait lut ki iit kali watla ki ieng kumba katto katne metre na katei ka jaka.
“Kane ka jingbthei ka la jia ha ka kali kaba pynieng hajan Red Fort metro station gate ba nyngkong. Ka jingbthei ka la long kaba jur bha,” bynrap shuh shuh u heh ka Delhi Fire Service.
Kane ka jingjia ka la wanrah ka jingsyier kaba khraw khamtam haba bun ki kali kiba la julor na katei ka jingbthei kaba jur.