SHILLONG, Nailur 15: Ki Nongshet ja sngi kiba dei ruh ki nongiarap (Cook-cum-helpers) kiba trei hapoh ka skhim PM POSHAN ha Meghalaya kin bteng ia ka jingiakhih khlem buh por haduh ka 30 tarik Nailur da kaba dawa ia ka jingshai halor ka lawei jong katei ka skhim bad ban pynkiew ia ka bainong.
Ki nongshet ki la boycotted ban leit sha ki kamra shet jong ki skul naduh bas dang u bnai Nailur.
U nongai buit jong ka seng u Bah Khroo L Pariat ha ka sngi Ba-ar u la ong ba ka jingiakhih ka la long kaba jai jai bad ka la ioh ruh ia ka jingkyrshan na ki nonghikai bad ki kmie ki kpa.
U la pynbna ba kum shi bynta ban pynjur ia ka jingiakhih, ka Union kan pynlong ia ki jingiakhih da kaba shong kyllain mungor ha baroh ki jaka treikam jong ki district ha ka 22 tarik u Nailur.
“Ha ka 22 tarik u Nailur, ngi thmu ban pynlong ia ka jingshong kyllain mungor ha man la ki jaka treikam jong ki district khnang ba kane ka jingiakhih kan kham don ka jingktah shuh shuh,” la ong u bah Pariat.
U la ong ba ka Union ka kwah ba ka sorkar kmie kan pynshai la kan bteng ne em ia ka skhim PM POSHAN.
“Ngi dawa na u Myntri Rangbahduh ka ri u Narendra Modi bad ka kynhun myntri sorkar jong u ba kin pynmih ia ka jingpynbna la ka Sorkar India kan bteng ia ka PM POSHAN ne kan sangeh noh.Lada ki bteng ki dei ban pynkiew ia ka jingsiew,” u la ong.
U bah Pariat u la ong ba kane ka skhim ka long kaba kongsan bha na ka bynta ka thain shatei lammihngi.
“Ngi shem ba kane ka skhim ka long kaba iarap bha, khamtam ia ka thain shatei lammihngi.Ngi ngeit ba hapoh ka jingialam jong u Myntri Rangbahduh ka ri u Narendra Modi, un pyrkhat ia ka thain NE namar kiba bun na ngi ngi dei ki riewlum bad ngi donkam ia kane ka skhim,” u la ong.
U la ong ba ki kynthei kiba bun na ki kidei ki nongshet jingshet ha kajuh ka pork um ki nongiarap bad dei ban ithuh ia ka jingnoh synniang jong ki sha ka jingroi jong ka thain.
Ka Union ka la ong ba lada ka sorkar ka rai ban pynsangeh noh ia katei ka skhim, kan khot ia ka jingialang jong ki nongshet jingshet bad ki nongiarap na kylleng ka thain shatei lammihngi ha Shillong ha ka taiew kaba ar jong u bnai Risaw ban rai ia ka rukom treikam kaban sa wan.
