Haduh 22 tylli ki ejahar la ïohpdiang ki pulit ka EKHD, halor ka jingjia shah thombor
Kumba 16 ngut mynsaw ki briew ba shah shoh
Shillong, Nailar 21: Ki Pulit jong ka East Khasi Hills District kila ioh pdiang haduh 22 tylli ki ejahar ha kaba ïadei bad ka jingshah thombor na ka rally thuk thuk ba la khot pynlong da ka Khasi Student Union (KSU) ha ka 19 tariku Nailar.
Kum ban shu kdew ba katkum ki sakhi ba la iohi lyngba ki dur khih ba ki briew kiba thombor ha katei ka sngi kidei kiba la kah dur khmat suda ha kaba kila shoh la tied ïa ki briew ba ïaid lynti, ka jingshah leh dusmon ki kali.
Na ka liang u Superitendent of Police ka East Khasi Hills u Bah Vivek Syiem u la pyntip ba ki briew kiba la mynsaw na katei ka jingshah thombor kila don haduh 16 ngut.
Shuh shuh u SP u la pyntip ruh ba ki kali kiba la shah leh dusmon bad shah pynjulor ki long haduh 31 tylli tang ha East Khasi Hills, hynrei lait noh ïa kiwei ki jingshah ktah ha kiwei pat ki District.
Na ka liang ki pulit mynta ki dang thwet ïa kito ki briew kiba donkti ban shoh ban dat ïa ki briew kiba shu ïaid lynti bad ïa kito kiba pynjulor ïa ki kali Assam bad kumjuh ruh ki kali shimet bad ki kali sorkar kiba la shah pynjulor.
Kum ban shu kdew ba kane ka jingshah thombor bad shah pynjulor ki kali kadei ha ka rally thuk thuk ba la khot da ka KSU halor ka jingkumar jong ka sorkar ban pyntrei kam ïa ki san tylli ki mat jingdawa ba ha khmat eh ba la seng kala buh.
Ki san tylli ki mat jingdawa ka KSU ki kynthup ïa ka jingdawa pynshitom ïa u Deputy Commissioner, Superintendent of Police, ki Heh Pulit bad ki nongtrei ka MSPCB namar ka jingkhang ïa ki paidbah ban leit ïa shim bynta ha ka public hearing ka Shree Cement ha East Jaintia Hills ba long ha ka 31 tarik Naitung.
Kiwei pat ki mat dawa ki dei ka jingpyntreikam pura ïa ka Meghalaya Residents Safety and Security Act, 2016 haduh ban da pyntreikam ïa ka Inner Line Permit, pynïeng ïa ki facilitation centre ha baroh ki18 tylli ki entry point ha ri-lum Khasi bad Jaintia ryngkat ka jingpynshisha da ki Dorbar Shnong, pyntreikam ïa ka Migrant Workmen Act, 2020 bala pynkylla, pynkylla thymmai ïa ka thung kam thung jam ha NEIGRIHMS kynthup ka ratio ba 80:20 ïa ki nos kynthei-shynrang, bad ai bhah ïa ki trai shnong, bad weng noh ïa ki interview ha ka thung kam ïa ki kam Grade B,C bad D nalor ban don ka SoP ha baroh ki Recruitment Board.