Da ka khusnam pynkup burom ka Urban Affairs ban ithuh ïa ki kam shlur u draibar bad nongbud ka Bos Jongngi

Shillong, Nailar 21 : Ka tnad Urban Affairs jong ka Sorkar Jylla ka la pynpaw ïa ka jingsngewnguh bad ka jingïaroh ïa ka jingshlur jong u Driver bad Conductor jong ka Bos Jong Ngi ha ka sngi ba ka bos kaba don ryngkat ki nongleit jingleit ka la shah ther maw ha ki riewshim kabu katba ka dang don ha Wahkdait Nongmensong haka 19tarik mynta u bnai.
Katkum ka kyrwoh na ka sorkar la ïathuh ba ka dei ha ka por kumba 5:51 janmiet, ka electric bus kaba don ïa ka registration number ML05 AH 5045, kaba dang leit na Air Force sha IIM, ka la ïaid lyngba ka thaiñ Wahkdait.
Ha katei ka por ka la shah ther maw kynsan ha ki riewshim kabu .
Ka jingshah kawang maw ka la pynpra ïa ka iit kali kaba shakhmat jong ka bus bad ka la buh ïa ki nongleit nongwan baroh ha ka jingsyier kaba khraw.
Hynrei la ïathuh ba wat hapdeng kane ka jingjia kaba jia kynsan kynsan, u driver Bah Fullmoonwell Lyngdoh bad u conductor Bah Banmanbha Marwien ki la shim mardor ïa ki sienjam ban pynjai jai ïa ki paidbah ban pyntikna ba kin ym mynsaw.
Ban ithuh ïa ka jingshlur, ka jingkitkhlieh bad ka jingïatreilang jong ki, ka tnad Urban Affairs ka la pynlong ïa ka jingïaleh burom ïa baroh ar ngut bad aiti ruh da ka song pisa kaba mar 10,000 tyngka marwei kum ka dak ka jingïaroh ïa ka jingaiti lut jong ki ha ka kam.