Hadien saw sngi lap ïa u khynnah ba ïap jyllop ha Wah Kynshi katba dang jngi bad u kpa

Mawkyrwat, Risaw 02: Ha ka 29 tarik u bnai baladep, u Heprit Mario Thongni, 14 snem ka rta u la wankai sha Shnong sha Nongmyllam namar ba ïoh shuti bad u la wan ryngkat bad u kpa jong u, u Bah Henry Nongtnger. Kine baroh arngut shi khun shi kpa ki la wan na Nongjri
Ha katei ka sngi haba la poi ha ka wah Kynshi, ha ka bynta ba ki ong ka wah Siangpliang, kaba don ha ki bynta ka shnong Nongmallam, ki la hap ba kam sha shiliang jong ka wah. Hynrei namar ba ym don kiwei kiwei pat ki lad ki lynti ban kam sh shiliang, ki la rai ban shu jngi noh tang ban poi sha la shnong.
Hynrei katba ki dangkam ïa kane ka wah, kynsan kynsan la wan ka um kaba heh bad ka la rong noh ïa ki baroh baroh arngut. Hynrei ha kane ka jingrong ka um, u kpa u la lait im katba u khun pat u la shah rong bak ha ka um bad sha ki jaka thwei kiba u kpa um lah shuh ban ïarap. Naduh katei ka sngi ka sngi, kaba la jia ha ka por 1:30 eiei mynsngi, ym shym la lap shuh ïa ka met jong u Mario. Ka daw ka long ba ka wah ka heh bad ka don ruh ki maw kiba heh ba heh.
Naduh katei ka sngi, ki shnong ki thaw ki la ïawad bad don ruh kiba la pyrshang ban ngam ne tynruh da ki dieng, hynrei ym shym la lap. Hadien kane la wan ïarap sa ki Pulit ka Fire and Emergency Services bad ryngkat ka jingïarap lang ka Search and Resvue Team (SRT) la lap ïa ka met jong une u hep rit mynta ka sngi ha ka por 11:45 eiei mynsngi.
Hadien ba la lap ïa ka met jong u la pyndep ïa ki jingdonkam baroh bad la wan rah noh ïa ka met jong u sha Shnong hapdeng ka jingïam briew kaba jur.