Lap ka HYC ba trei tang dep u kontraktor ïa ka surok ba kyrshan pisa ka World Bank
Da ki Nongkhwai ruh ki ithuh ba dei ka jingtrei torti
Shillong, Risaw 02: Katto katne ngut ki Nongkhwai kiba la mih na ïing ban leit khwai mynta ka step, katba ki dang ïaid ha kawei ka bynta jong ka surok kaba ïaid na Mawmaram shaduh Lad Umsaw, Ri Bhoi, ki la ïohi ïa ka surok kaba dang shu dep siang rong ba ka la khoh bad orpait. Mar kumta hi ki la pyrshang khlong da ka kti bad shisha ka jingsiang rong ka suk bha ban khyllie wat tang da ka kti ruh, la kumba khyllie ïa u shylliah ne ka carpet ba siang ha ïing.
Namar ba kadei ka juk jong ka Social Media, kine ki nongkhwai ki la post ïa ki dur bad ki video ha Social Media ïa kane ka jinglap jong ki. Tang shiphang ka video ka la saphriang bad poi ruh sha ki nongïalam ka HYC Diengiei bad Krang Cricle. Kine ki nongïalam ruh khlem da pynslem ki la hiar ban jurip ha shi lynter kane ka surok bad ki lap kajuh hi ka jinglap kumba la lap ki nongkhwai ha kaba kane ka surok ha shi lynter la shu siang tang dep bad ka rong ka khoh da kaba suk.
Na ka liang ki nongïalam ka HYC ki la pynpaw ka jinglyngngoh kumno kane ka surok kaba dei na ka skim jong ka jong ka sorkar India lyngba ka Meghalaya Intergrated Transport Project bad ba la bei tyngka da ka World Bank, la shna ha kane ka rukom. Ka Seng ka la kynnoh ba dei ka Kompeni M/S Tanor Engieering Sunshine Sawkmie (JV) kaba la trei ïa kane ka surok. Katkum ki khubor ba la ïoh lum la ïathuh ba ïa kane ka surok la mang kumba 64 Klur tyngka.
Ka Seng ka pynpaw ka jingsngewkhia kaba jur ha kaba ïadei bad ka rukom trei torti ïa kane ka surok namar ba kadei ka surok kaba donkam bha ïa ki paidbah jong ka Shong jong ka Diengïei Area kaba kynthup ïa kiba bun tylli ki Shnong kum ka Mawmih, Diengïei, Mawlyndep bad kiwei de ki shnong kiba kane ka surok ka ïaid lyngba naduh Mawmaram, Nongthliew, Umthlong shaduh Lad Umsaw ha kaba kiba ki kit ïa i mar rep jong ki. Nangta kiba leit ba wan sha kylleng kylleng ki jaka na ka bynta kiwei pat ki kam.
Ka Seng ka kyntu ruh ïa u MLA jong ka Sohïong, ba un shimkhia bad tuklar ïa kane ka kam, namar kadei ka surok kaba hap hapoh ka Constituency jong u.