Shillong, Risaw 02 : U Working President ka UDP, Bah Titos W Chyne ha ka sngi Nyngkong u la ïathuh ba ki la don katto katne ngut kiba la wan ban pan tiket na bynta ban aireng ha ka elekshon MP kaban long ha u snem ban wan.
Haba kren bad ki lad pathai khubor hadien ka jingïalang jong ka UDP Youth Wing u Bah Titos ba dei ruh u MDC ka Shella u la ïathuh ba ïa mynta hi kim pat shim kano kano ka rai ïano kin ai tiket.
Haba kren pat halor ka elekshon MDC, u Bah Titos u la ïathuh ba ki la don ki kyrtong kiba wan pan tiket hynrei ha kane ka bynta ruh ki leh kumjuh namar kim kwah ban leh kyrkieh. “Ngim pat kyrkieh ban pynmih ne pynbna noh ïa ka kyrteng jong ki kyrtong ban ïakhun ïa ka elekshon MP lane ha ka elekshon MDC kaban long ha u snem ban wan,” u la ong.
U la ïathuh ruh ba ïa ka kam ban peit na ka bynta ban sei ïa ki kyrtong MDC la aiti ha ki President ha ki District bad ha ki nongïalam khamtma ki MLA ban peit bad pynïaid shakhmat ïa ka kam.
La ïathuh ruh ba ha ka jingïalang kaban sa long shen, ka Party kan sa sdang ban peit ïa ki kyrtong ha man ki constituency watla kim pat kwah ban leh kyrkieh.
Shuh shuh u ong ruh ba ka party ka don la ka jong ka rukom treikam haba ïadei bad ka jingbym pat kyrkieh ban pynbna noh mynta ïa ka kyrteng jong ki kyrtong ban aireng ha ka elekshon MDC kumjuh ruh na ka bynta ka elekshon MP.
Kumba long mynta na ki bun tylli ki party kiba don ha ka jylla, dei tang ka VPP kaba la dep ban pynbna ia u kyrtong MP, kata u Dr. Ricky Syngkong. Katba kiwei ki party kynthup naduh ka NPP, UDP, Congress, TMC, BJP, HSPDP nalor kiwei kiwei.
