Shillong, K’Lyngkot 05: Hadien ka jingjop Rivaval Healing Festival kaba dang shu dep ha u snem ba la leit hapoh ka jylla Nagaland, ka Gatekeepers of Meghalaya kala pynbna ba ka jylla ha ka 27 haduh ka 30 tarik u kyllalyngkot kan ïoh ban pynlong pat ïa ka Meghalaya Rivival Healing Festival 2026.
Haba kren bad ki lad pathai khubor u Bah Crosslin Marbaniang uba dei u Convener u la pyntip ba ïa kane ka Festival yn pynlong ha madan Dieng Jabini mar pyrshah bad ka madan Kurkalang, Bhoirymbong, Ri Bhoi District.
U Bah Crosslin u la iathuh ba ha sngi ba khatduh jong ka Healing Festival ha Dimapur jong ka jylla Nagaland u trai u la kren sha u shakri jong u, u Apostol Ankit Sajwan ba ha ka wat kaba ar kane ka festival kadei ban long sa hapoh ka jylla Meghalaya bad ki khlem da lah ban mutdur ba kane kan wan urlong kloi.
Kumta na ka liang u Bah Crosslin u la pynpaw ba u khmih lynti ba ki paidbah jong ka jylla na kylleng ki District bad ruh ia kiwei de ki jylla kin wan sha kane ka festival bad u la kyntu ruh ba kin wan ïalam lang ïa kiba pang kiba shitom khniang ba kin ïoh ïa jingduwai na ki shakri jong u Blei.
U nongkren ha kane ka Meghalaya Rivival Healing Festival 2026 un dei u Apostol Ankit Sajwan bad ka kurim ka jong u ka Minika Sajwan bad ka kynhun rwai praise and worship kan dei napoh ka jylla Nagaland bad kumjuh ruh na Delhi.
Haba ïathuh ïa ka jingkhmih lynti ha kaba ïadei bad ka festival kaba long ha Dimapur u Bah Crosslin u la iathuh ba ki dang pynkhreh ba ki paidbah kin poi tang kumba 40 hajar ngut eiei, hynrei da ka jingleh phyla u blei ki khlem lah ban mutdur ba ki briew ki poi da ki lak ngut bad kham eh ha ka miet ba khatduh ka jingpoi jong ki riew ngeit ka long haduh 2 lak ngut tam.
Shuh shuh u Bah Crosslin u la iathuh ba ka jingpynkhreh kala sdang naduh mynta ka sngi bad ka jaka ban pynlong ïa kane ka Meghalaya Rivival Healing Festival 2026 ka don haduh 20 akar, kumta u la khmih lynti ba ki paidbah kin poi bun bha ha kane ka festival kaba pynlong hapoh ka jylla Meghalaya.
U la pyntip ruh ba ki bor pynïaid district ki long kiba kloi bha ban ïarap tang shu tip ha kaba iadei bad kane ka jingthmu bad u la bynrap ruh ba ka por kan dei naduh ka por 4 baje haduh 9 baje janmiet.
Shuh shuh u la pyntip un ym don ki briew kiba nabar jong ka ri hynrei tang napoh ka ministry jong u Apostol Ankit Sajwan bad ki Balang niam bapher bapher napoh ka jylla Meghalaya kiba la wan sha khmat ban ïa trei lang ryngkat.
