Shillong, Risaw 27: U Myntri ka tnat Bording u Abu Taher Mondal u la pyntip ba un sa peit bad khmih bniah biang ïa ka jingpyntreikam ïa ka Dam Rehabilitation and Improvement Project (DRIP) ha Myntdu Leshka Hydro Project hadien ka jingpynlong ïa ka elekshon shiteng samoi ha Gambegre.
“Ngan sa khmih bniah biang ïa kane ka project hadien ba la kut ka elekshon shiteng samoi,” ong u Mondal.
“Nga la dep ban leit jurip ïa ka Myntdu Leshka power project ha u bnai Jymmang ha une u snem bad ha katei hi ka por, kane ka projek ka la jan dep artad,” u la bynrap.
Ha kane ka jingleit jngoh, u Mondal u la banjur halor ka jingdonkam jong ka jingtrei shitom bad ka jingtbit ka kam kadei ban long kaba thikna na ka liang ka M/S. Multi Tech Engineers, ka kompeni ba la aiti ba kan pyndep ïa kane ka project.
U la pynpaw ruh ïa ka jingthmu jong ka sorkar Meghalaya ban pynbha bad ban shaniah beit ïa ka bording ha la ka jong da ka jingtei ïa ki jaka pynmih bording ne power generation. Na ka liang u Myntri ka tnat Bording u la ïathuh ruh halor ka jinglong kongsan jong ka Myntdu Leshka Hydro Project bad u la pynthikna ïa ki jingpyrshang ban pyndep ïa kane ka kam ha ka por kaba biang.
