Hadien ba u phet shisngi, ïohkem paidbah shnong ïa u Bah Bailing Wahlang bad aiti sha ki Pulit

Mawkyrwat, Naitung 15 : Hadien shi sngi ba u la phet hadien ka jingjia kaba la poi haduh ka jingïap jong ka para jong u ha Mawkhan, Pyndenumsaw, ki paidbah shnong jong ka Pyndenumsaw, South West Khasi Hills District, hadien ka jingbuddien kaba jur ïa ka ïaid ka ïeng jong u, dang step ki la ïoh kem ïa u Bailing Wahlang, 62 snem ka rta, mynta ka sngi Balang, ka 15 tarik u Naitung, 2026, na shnong Rohbah, South West Khasi Hills District.
Katkum ka jingïathuh jong ki nongshong shnong, hadien ba ki la ïohkem ïa u ha Rohbah, ki la ïalam ïa u sha Ïing Dorbar ka shnong Pyndenumsaw bad aiti noh ïa une u suba sha ki bor Pulit ban leh ïa kaba donkam katkum ka aiñ.
Kum ban shu pynkynmaw, u Bailing Wahlang ula phet na Mawkhan, Pyndenumsaw hadien ba la suba ba u la thombor da ka tari ïa la ka para jong u, ka (L) Snity Wahlang, 53 snem ka rta, kaba la khlad noh na ka jingmynsaw ha kaba kane ka jingjia ka la jia ha ka step jong ka 14 tarik u Naitung, 2026, ha ka por kumba 6:40 mynstep.
Ha ka khubor na u Bah B. Jyrwa, MPS, Superintendent of Police, South West Khasi Hills District, ki Pulit ki la ïoh jingtip ha ka por kumba 7:30 mynstep ba ki paidbah ki la ïohkem ïa uba suba na Rohbah. Mar ïa ïoh ïa kane ka jingtip, ki Pulit ki la leit mar mar sha shnong Pyndenumsaw ban shimti ïa uba suba bad la pynkit ïa u sha Civil Hospital, Mawkyrwat ban leh ïa ka jingkhmih ne ka medical examination.
U SP u la ïathuh ruh ba katkum ka kaiphod jong u Medical Officer, la lum bad kurup ïa ki jaiñ ba u phong ryngkat bad ka sampuli snam jong u kum ki sakhi ba kongsan ha ka jingtohkit.
Hadien ba la pyndep ïa ka medical examination, la wanrah ïa uba suba sha Mawkyrwat Women Police Station, ha kaba la kem noh ïa u katkum ka aiñ hapoh ka Mawkyrwat Women P.S. Case No. 12/2026, kaba la register hapoh ka Section 103(1) jong ka Bharatiya Nyaya Sanhita (BNS).
Ha ka jingtohkit kaba la bteng, uba suba u la pynpaw ba u don bynta ha katei ka kam bad u la mynjur ban ïalam ïa ki Pulit sha ka jaka ba la buhrieh ïa ka tiar ba la pyndonkam ha ka jingleh ïa kane ka kam, khnang ban ïoh kurup ïa ka.
Halor kine ki jingshisha bad ki jingdonkam jong ka jingtohkit, la ïalam ïa uba suba hakhmat ka Ïingbishar jong ka Chief Judicial Magistrate bad la kyrpad ban ai ïa ka Police Custody na ka bynta shi sngi, khnang ba ki Pulit kin lah ban pynlong ïa ka jingpyni biang ïa ka rukom jia ka kam (crime scene recreation), ban ïoh kurup ïa ka tiar ba la pyndonkam bad ban lap shuh shuh ïa ka daw bad ka jingthmu jong kane ka kam.