Hadien ba ïeng 131 snem kylla dpei ka skul KJP Girls HS tang da ki khyllipmat,sah umdum bad jaw ummat kthang ki paidbah

Shillong, Jymmang 21 : Hadien 131 snem ba ka Skul Khasi Jaintia Presbyterian Higher Secondary (KJPHS) ba ka la ïeng rasong ban shakri kum ka shlem ban saiñdur ïa ka jingnang jingstad jong ki khun kynthei ka jylla tang shikyllipmat kane ka skul ka la kylla dpei noh namar ka ding kaba klang ka la bam duh ïa kane ka skul mynta ka step Sngi U Blei ha ka por hapdeng ka 1.30 bad 2 baje ei ei dang step phyrngap.
Kane ka jingjia ka la pynsah umduh bad buh ia kiba bun ha lang ha ka jingsah lyngngoh kumno ka jia namar ka dei ha ki kynta pynlip bording ka MeECL. Kane ka jingjia ba sngewsih ka la pyniam kthang bad pynpait dohnud ruh ïa ki hajar bad phew hajar khamtam kito kiba la don ka jingïadei kaba jan eh bad ka skul naduh ki nonghikai haduh ki khynnah skul mar syn ïohi ïa kane ka jingjia na ki lad pathai khubor mynta ka step.
ïa kane ka skul la seng da I Missionery na ri Wales I Mem Bessie Williams naduh u snem 1892 bad ka la sei da ki hajar ngut ki samla bad ki longkmie kiba trei bad shakri ha ki kam bapher bapher.
Wat la ki paid nongshong shnong jongka Dong Mission Compound bad ki Dong ba marjan ki la ïa wan sha katei ka skul mar ïa ïohi ïa ka jingklang ka ding hynrei ki shu ïapeit ïa ka jingïeng bad klang ka ding namar kim lah ban leh ei ei nalor ba ka dei ka por ba rang ryngkhiang bad tyrkhong bha ka mariang khamtam ba jur bha ka lyer ruh.
Ka Ding ka la bam duh ïa baroh khoit ki bynta ba dang dei da ka dieng jongka skul. Kane ka jingpynjulor jongka ding ka la pynlong ïa ka skul ban duh lut khoit ïa ki kot ki sla kiba ka la buh sah jingkynmaw, ki dur ki dar jong ki nongseng, ka Piano kaba nyngkong eh ha Meghalaya kaba don ha ka Hall jongka skul, ki Kot Niam bapher bapher bad kiwei kiwei ki jingdon jingem.
Ha ka por ba ka ding ka dang klang bha ki paid kiba wan sha katei ka jaka ki la ïarap ban ïoh sei lem ïa ki khynnah hostel kiba sah hajan katei ka skul hi. Da ka jingïarap jong baroh la lah ban sei ïa baroh ki khynnah hostel bad ym don iwei ruh iba mynsaw. ïa kine la ïalam pat da ki bor synshar shnong jongka Dong Mission hapoh ka jingïalam jong u General Secretary bah Donkupar War ban pynshong ïaki ha Dorbar Hall Mission Compound tad haduh ban da dep pynlip ïa ka ding bad sa ïalam biang ba kin leit phai pat sha hostel.
Kat haduh ba thoh ïa ka khubor ym pat lah ban tip haduh katno ka jingjulor ka la kot na kane ka jingbamduh jongka ding namar ka jinglum jingkheiñ bad jingtohkit ka dang ïaid shakhmat.