Ha u tyllai phasi pynkut u rangbah la ka jingim

0

Shillong, Risaw 19: Ha ka step sngi Balang ki nongshong shnong ka Riat Laban ki la par ‘ñiang khriat da ka jinglap ïa ka met ïap jong uwei u briew uba dkhat noh ïa la ka jingim da kaba sdien ïa lade ha ka khlaw Manik Road ka lynti ban kiew sha Upper Lumparing.
Ïa ka met ïap jong une u rangbah briew lap nyngkong da uwei u khynnah jong katei ka dong, bad mar mar u la ai jingtip noh sha ki pulit jong ka Laban police station.
Na ka liang ki bahaïing bahasem hadien ba ki la leit ban peit ïa ka met ha katei ka khlaw ki la kubur ba u dei u bahaïing jong ki uba la phet na ka ïing ha ka janmiet sngi ba-ar.
Haba kren bad ki nonglum khubor, u khun ruit jong une u briew uba sdien phasi u la ïathuh ba une u rangbah uba dei u kpa jong u khun marwei u la don ha ka jingshitom lah ba la ban la katto katne por kaba um lah shuh ban trei ba ktah bad u ong ba kane ka jingdkhat noh jong u la ka jingim ruh lehse ka dei na ka jingsngew ba u long ka lyngkor ha ka iing ban pyndap pynbiang ïa ka bai dawai dashin namar u wan na ka iing kaba duk bad ba u khun jong u u dang don hapdeng ka jingpule.
“Ngi la rai na ïing ba ngin leit pynshim dawai ïa i pa sha Guwahati la shem taïew namar i don ka jingpang nervous system, hynrei barabor i ju ong ïa ngi ba im kwah ban pynjynjar ïa ngi,” ong u khun jong une u rangbah briew.
U la bynrap ba kam don ka jingkyrduh ha ka pisa pilaiñ namar ki la ïa synnïang lang shi bahaïing ban phah sumar, “hynrei ym lah ban tip kaei kaba pynlong ïa i ban shitom jingmut haduh katne kat ban shim noh ïa la ka jingim,” La ong u Khun.
La wan ban shimti noh ïa kane ka met da ki pulit ka Laban bad la pynkit noh ïa ka met sha Civil hospital ban pyndep ïa ka Post Mortem.

Leave A Reply

Your email address will not be published.