Ha u President shaniah ki heh UDP ban jied ïa u General Secretary ba thymmai ka party

By Mawphor Editor On Jul 6, 2025

Shillong, Naitung 05 : Ki nongïalam jong ka United Democratic Party (UDP) ki shaniah ha ka rai bad ka jingïalam jong u President rangbah ka party Bah Metbah Lyngdoh na ka bynta ban jied ïa u General Secretary ba thymmai jong ka party hadien ka jingresain kyndit u Dr. Jemino Mawthoh na ka kam kaba u la bat baroh shi katta.
Haba ïoh ban ïakren bad uwei na ki nongïalam jong ka UDP ba dei ruh u Myntri ha ka sorkar jylla, Bah Kyrmen Shylla u la ïathuh ba party ka la ai bor ha u President ka UDP ban ban rai halor ka jingthung ia u General Secretary ba thymmai jong ka Party.
Haba kren bad lad pathai khubor dang shen, u Bah Kyrmen u la ong ba ha ka jingïalang bad dang shu dep, ka UDP ka la rai ban ai bor ha u President ka Party u Bah Metbah Lyngdoh, ban rai, ïano yn thung General Secretary ba thymmai.
“Ha ka jingïalang ba dang shu dep, ngi la ai bor ha u President ba un shim rai bad pyndap ïa ka jaka ba thylli kham kloi kat kaba lah,” la ong u Bah Kyrmen.
Nangta, u ïathuh ruh ba ka rai ka shong mynta ha u President ban shim ïa ka rai kaba khatduh haba ïadei bad katei ka kam.
U Bah Kyrmen haba jubab halor ka jingkylli, u la ïathuh ruh ba ki don bun bha ki nongïalam ha ka party kiba la bit bad la biang pura ban bat ïa ka kam General Secretary. Hynrei u ong pat ba ka shong mynta pat ha ka party ban jied ïa uba paka tam ban bat ïa ka kam.
Halor ka jingkylli ba ki MLA ki lah neem ban bat ïa ka kam General Secretary, u Bah Kyrmen u la ong ba ha ka party kam don satïa kano kano ka kyndn kaba khang ïa ki ban bat kam ha ka party.
Dang shen na ka liang u President ka party Bah Metbah Lyngdoh u la ïathuh ba shen hi kin sa shong noh ïa ka Central Executive Committee na ka bynta ban jied ïa u General Secretary ba thymmai.
“Ngi la dep ban pdiang ïa ka jingresain noh jong i Bah Jemino Mawthoh kumta shen ka CEC kan sa shong ïa ka jingïalang ban ïakren na ka bynta ka jingjied ïa u General Secretary ba thymmai jong ka party,” u la ong haba kren bad ki lad pathai khubor dang shen.