Shillong, Ïaiong 20 : Ka jingsiew dep ïa ka pisa kaba dang sah kaba kot sha ka 565 klur sha ka National Thermal Power Corporation Ltd (NTPC) yn sa pyndep noh ha shwa u Lber 2026. Ka pisa kaba dang sah bad ka NTPC haduh ka 31tarik Lber, 2023 ka long 664 klur, kata hadien ka jingpynbiang bad ka LPSC. La ong ruh ba da ka jingïakren bad ki heh ka NTPC, la ïa mynjur ban ïa pynbeit bad katei ka pisa kaba long 565 klur tyngka. Ki tyllong khubor ha ka tnad Bording ki ïathuh ruh ba ka sorkar jylla ka la mynjur ïa katei ka jingthmu ban pynkhuid noh ïa ka pisa kaba sah da kaba siew marbiang ha ki 36 tylli ki bnai kata naduh u Ïaiong 2023 kaba long 15.70 klur shibnai. “Kane ka jingsiew kan long beit man la u bnai bad yn sa pyndep noh ha u Lber 2026,” ong ki tyllong khubor na ka tnad.
