(MM Thaïang)
Jowai, ïaïong, 20: Ki paid Khristan ha kylleng ka pyrthei manla u snem naduh ka sngi ba nyngkong ka jingmihpat u Jisu na ka jingïap haduh mynta mynne ki rakhe ïa ka sngi Paskha (ka sngi jingmihpat u Trai Jisu) ban kynmaw ïa kaba u Jisu u la shah shitom na ka bynta ban pynim ïa u khun bynriew ha shi khrum ka bneng shityllup ka pyrthei. U la wan longbriew sha kane ka pyrthei, u la shah shitom, u la shah ïap bad u la mihpat na ka jingïap.
Ryngkat ka Balang Catholic baroh kawei, ki paidriewngeit ka Jowai Parish ha ka sngi u Blei ki la ïatuid sha ka Shrine jong ka Saint Theresa, Marian Hill ban rakhe ïa ka sngi ka jingmihpat jong u Jisu na ka jingïap.
Ha kane ka jingrakhe ïa ka sngi ka jingmihpat bad ka jingjop jong u Jisu ïa ka jingïap, ha ka por mynstep la pynlong ïa ka jingknia Mass Iukharist Bakhuid ba la pynmynta da u Fr. Augustine Lamin, uba long ruh u Asst. Parish Priest jong ka Parish Jowai bad u Vice Principal jong ka Marian Hill Higher Secondary School, Jowai.
Hadien ka jingpule ïa ki lai tylli ki jingpule na ka Jynthoh Bakhuid, u Fr. Augustine u la pharia ïa ka Ktien u Blei sha ki paidriewngeit ban puson halor ki lai tylli ki jingpule.
Haba kren ha kane ka sngi u ong, ka jingmihpat u Jisu na ka jingïap ka dei ka jingjia kaba khraw tam bad kaba la pynlyngngoh ïa ki briew bad ïa ka bor jong ka mariang namarba ym ju don koit u briew lane ka briew u ne ka ban mihpat na kaba ïap kumba mihpat u Trai Jisu met bad mynsiem.
Ki riewkhraw jong ka pyrthei ki ïap ym don ka jingmihpat, hynrei ïa ka jingmihpat u Jisu na ka jingïap, ki riewstad jong ka pyrthei bad ki jingthoh Baible ki ieng sakhi shai kdar ba u Jisu u la mihpat na kaba ïap.
Ha ka jingkren sneng kren kraw ïa ki paidkhristan, u Fr. Augustine Lamin, u ong na ka bynta ki Khristan ha ka sngi Baptisma ki la rung ha ka jingtep jong u Jisu bad ki la mihpat sha ka jingim ka bathymmai bad u Jisu. Nangta u ong lyngba ka Baptisma ki Khristan ki kylla long ki Khun jong u Blei ha u Jisu Khrist bad haba ki long ki khun ki jong u Blei, ki long ki nongïoh pateng lem bad u Jisu Khrist. Shuh shuh u ong ka jingmihpat jong u Trai Jisu ka ai jingkyrmen ïa ki paid khristan ba kin sa mihpat kumba mihpat u Jisu shisien ka sngi, ong u Sohblei Augustine Lamin.
U Fr. Augustine u pynkut ïa ka jingkren jong u da kaba ong, “to ngin long ki sakhi jong u Trai Jisu uba la mihpat, ngin im, ngin sakhi ïa ki jinghikai jong u ban im ha ka hok ka sot, ha ka tipbriew tipblei, ha ka akor ka burom ha la iing ha la sem, ha ka imlang ka sahlang ha ka shnong ha ka thaw, ha ka Balang bad hakhmat ka pyrthei katba lah ei.”
Kum ban shu pynkynmaw ha kane ka sngi, ha ka jingduwai ki ‘riewngeit, la duwai ruh na ka bynta ki jingthmu jong u Kpa Bakhuid Pope Francis, na ka bynta ka Balang, na ka bynta ki nongsynshar ri, na ka bynta ki bapang kiba shitom bad na ka bynta ka jingshongsuk shongshngaiñ hapdeng ki para briew.