Ha u ADC pynpaw ka Sur u Paidbah Dong Namchiang ba sniew palat ka surok bad jingkieng

Khliehriat, Naiwieng 08: Ki nongïalam jong ka Sur u Paidbah Dong Namchiang ba na ka thaiñ Narpuh ha sngi Palei ki la kynduh ïa u ADC ka East Jaiñtia Hills District, u bah G.Warjri bad ki la pynpaw ka jingsngew diaw bad sngew khia namar ka jingsniew palat ka surok bad ka jingbuh jingma ki jingkieng kiba don ha surok NH-6 ha ka Narpuh kata naduh Tongseng ter ter shaduh Ratacherra- Malidor.
Ki nongïalam jong katei ka Sur u Paidbah Dong Namchiang, ki la iathuh ruh ba bunsien ki khynnah ruh kim ju lah shuh ban poi biang por sha ki skul na ka daw ka jingjur ka jingdheng kali bad jingsniew palat ka surok ha ka thaiñ, kane ka la buh jingeh ruh ïa kiba pang ba shitom kiba mut ban leit wad dawai bad kito kiba mut leit sumar sha ki jaka ai jingsumar, ym tang katta ka la ktah ruh ïa ka trei ka ktah jong ki paidbah khamtam eh ha ka khaii ka pateng.
Na ka liang President ka Sur u Paidbah Namchiang, u bah Shiruplang Surong u la ong bad pynpaw ba naduh Kuliang ter ter ka la sniew palat ka surok, u la kyrapad ruh naduh u DC, MLA, MDC ba kin sngewbha ban iarap lem bad iakren bad ki bor ba dei peit ba ka NHAI kan dup sdang ban maramot bha ïa ka surok bad ki jingkieng, u kyntu jur ïa ka sorkar ba kan phai khmat lem sha ka dong ka thaiñ namar ki paidbah ki la mad jingeh haduh katta katta.
Na ka liang u Secretary, u bah Seiros Lamin, u kyrpad ïa ki kali kiba kit palat pud ba kin sngewbha ban kit duna noh kumba dei ban kit (under load) namar kumba long mynta ki bun bha ki bynta ha kiba bun ki jingkieng ki la buh jingma, don kiba la sdang ban pait bad synjor bha te lada jia ba kheiñ ki jingkieng kan wanrah ïa ka jingdun nong kaba khraw ym tang ïa ki paidbah hynrei wat ïa ki pynkit mar wat ïa ki trai kali ruh.
U la iathuh ruh ba bun ki khynnah kim ju poi biang por sha ki skul bad kane ka buh jingeh bha ïa ki khynnah skul khamtam mynta ba la jan ki exam ba ki hap ban ialeh ïa ki exam ki donkam ban poi biang por.
Ha kane ka sngi ki nongïalam ki la buh ruh da ka jingthoh hakhmat ki bor synshar district ka East Jaiñtia Hills District ba la soi kyrteng da u President ka Sur u paidbah Dong Namchiang, u bah Shiruplang Surong bad u Secretary u bah Seiros Lamin, ha kane ka jingkynduh ïa u ADC ha Khliehriat la synran lang ruh da ki dkhot ka sur paidbah Namchiang ba kynthup u bah Golden Rymbai, uba na Umkiang, u bah Karlus Pohtam na shnong Borsora bad u bah Mebanteilang Mynteng na Ratacherra.
Na ka liang u ADC u la ong ba ki bor district kin sa khot biang ïa ka jingialang ha kaba yn khot lang ïa ki tnat bapher bapher, ki sengbhalang , ki briew na ka NHAI ban iakren biang halor kane.