Ha shiteng lynti haba ban hiar shwa ki nongpang, ud ki paidbah ba khlem pyndep ban siang rong ïa ka surok

Mawkyrwat, ‘Naiwieng 16: Ki paidbah jong ka dong ka thaiñ shilliang katba nang mih ki sngi ki la nang ïakynduh bun ki jingeh khamtam eh ha ka ïaid ka ïeng lyngba ki kali bad ki paidbah kiba ju ïaid lyngba ka surok Mawthawpdah – Laitlawsnai sha Rangdkhiew ter ter ki shnong kiba hapoh ka South West Khasi Hills District.
Haba ïoh ban ïa kren bad ki katto katne ngut ki nongñiah kali bad kumjuh ruh ki paidbah nongshong shnong kiba ju pyndonkam ban ïa lyngba ka surok Mawthawpdah – Laitlawsnai sha Rangdkhiew ki la pynpaw ka jingsngewdiaw namar ka jingbym shimkhia jong u nongpyntrei ne contractor ha kaba ha kine ki ba dang don u slap u la sdang ban wan buh maw bad sdang ruh ban siang ne buh maw ïa ki jaka ba long thliew, hynrei phew naduh ba u la sdang ban buh ïa u maw haduh mynta um pat leh ei ei ne siang da ka rong. “Ki maw kiba u la dep ban bun ruh mynta da ka jingïaid jong ki kali wat kiba la dep ban tap da ka khyndew ruh ki la sdang ban don ha ka ki jong ki jong ne khoh namar ka jingwan ïaid jong ki kali”, ki la ong.
Ha kawei pat ka liang, ki la ong ruh ba kaba sngewsih ka long ba ki don ki jaka jaka ba haba kit ïa ki nongleit nongwan bunsien la hap ban hiar shwa bym lah kiew ka kali bad ynda la poi ha ki jaka ba kham biang ki sa kiew pat namar ba sniew palat ka surok bad kaba kham sngewsih bad sngewsynei pat ka long haba kit ïa ki nongpang ruh la hap hi ban pynhiar shwa shiteng tang ban ïoh ban ïaid shakhmat ïa kali bad ban pynpoi pat ïa ki nongpang sha ki jaka sumar.
Namarkata, halor kane jingeh jong ki paidbah nongshong shnong haduh mynta ymdon mano mano ruh ba patiaw lem wat hadien ba la dep ban pynsngewud ban nam. Kumta sa shi sien ki paidbah nongshong shnong ki buh biang ka jingkyrpad ïa ki bor ha halor kum ki nongmihkhmat nyngkong eh nangta ka tnad PWD (Roads), bad kumjuh ruh ïa u nongpyntrei ba ka dei ban sngap lem ïa kane ka jingkyrpad ne jingpynsngew khnang ba ki paidbah kin nym ïa kynduh jingeh ha ka ïaid ka ïeng bad khamtam ha ka pang ka shitom lyngba ka jingkit da ki kali.
Lah ban kdew ruh ba lyngba kane ka surok ka lah ruh ban pynïasoh haduh khyndai (9) tylli ki shnong bad mynshwa lei ki ai kyrteng ïa ka ka surok Mawthawpdah – Marngor ïa kaba la sdang shna ne tih thymmai naduh ki snem 1993-’94 lyngba ka skhim MLA ha ka por ba u bah Rowell Lyngdoh u la long u MLA jong ka Mawkyrwat Constituency bad ki shnong ki long ka shnong Laitlawsnai, Rangdkhew, Mawsynrap, Mawjyrsim, Mawsep, Pynden Mawramhah, Mawthong, Mawlarkon bad ka Sohmasem.
Kumta, wat buh tang ha ka jingthoh ne ka ktien ban ong ba, “ka surok ka dei u budlum ka ïoh ka kot, katba kam pat kam ïa dei haei haei ruh em”.