Ka jingsngewpher jaidbynriew ha Langpih ka mih na ki riew saiñ pyrthei

Langpih, Naiwieng 16: Ka Langpih ka jaka ba ju mih ka jingïakynad barabor hapdeng ki pulit Assam bad ki Khasi kiba shong ba sah ha katei ka thaiñ mynta lah da ki phew phew snem, ka dei ruh kaba eh bad kaba jwat bha ban pynshisha la mano ba dei trai jaka haduh kine ki sngi, namar ka jingbym pat biang la u pud u sam ha kaba ka Assam ruh ka kam kynti ïa ki jaka puta jong katei ka thaiñ kumjuh ruh ka jylla Meghalaya.
Ka jingbym pat lah ban pynbeit ïa u pud u sam haduh kine ka sngi, ka ju wanrah jingeh ïa ki paid nongshong shnong jong katei ka thaiñ, namar ki pulit Assam kim ju shongkli kti hynrei ban pyndik na ka por sha ka por.
La kynnoh ruh ba ka ju don ka jingïakynad hapdeng ki jaidbynriew Nepali kiba shong ba sah ha katei ka thaiñ. Hynrei, ha kaba ïadei bad katei ka phang na ka liang jong u nongthoh khubor haba ïoh ban ïakren bad ki katto katne ngut ki riew pawkhmat jong katei ka thaiñ kiba na ka jaidbynriew Nepali, ki la ong, “Da ki phew phew snem ngi la shong la sah ha kane ka thaiñ, ngi imlang sahlang naduh dang khynnah, ngi la heh la san ha kane ka jaka don ruh kiba la kha hangne naduh ki meiieit paieit jong ngi bad ngim ju don kano kano ka jingïakynad bad ki Khasi”.
“Ngi ki Nepali ngi la nang ïa ka ktien khasi bad ki khasi ruh ki la nang ban kren ïa ka ktien jong ngi, lada dei ba ngi ïashrut kumno kumno ruh ngi nang ban ïa sngewthuh lyngba ka jingïakren. Ka jingsngewpher jaidbynriew hi ka wan lyngba ki briew jong ka saiñ pyrthei, ym na ngi ki rit ki ria” ong u Bikash Chettri President ka Langpih Anchlak Gorkha Student Union.
Haba ïadei pat bad ka jingïapynbeit pud u Bikash u la ong, “Lada ki bor jong ka sorkar ki pynhap ïa ngi sha Meghalaya ne sha Assam ruh kam pher, ngi long kiba la kloi ban shu kohnguh, namar ngim don bor ei ei hynrei tang ban shu mynjur. Lada ka sorkar kaba synshar mynta ka pynhap sha Assam, hynrei hadien 5 snem lada kylla sorkar ki lah ban pynkylla biang. Ka jingkwah jong ngi ka dei beit tang ban shong suk shong saiñ kumba ngi ju long baroh shi katta bad kam ju don kumta kata ka jingïakynad bad ki paralok Khasi”.
Na ka liang u Rambahadur Chettri u ba dei uwei u riew tymmen u ba shong ba sah ha ka shnong kaba la tip kum ka Lawbah ne ka Harsha Nagar ha katei ka thaiñ, u la ong, “Haba ngi wan ha kane ka pyrthei ka dei tang kum ka jingwan iew ban thied ban pet. Ynda ngi la dep siew ngi hap ban phai biang sha la ïing, kumta ka jingim u briew kruh ka long kumta namar ngi hap ban phai biang sha ïing u kynrad. Nga sngew ban ong ba ka jingïakynad jong ngi kam don jingmut bad ngim ju don ruh kaba kum kata lait noh kiba malu mala ba ha ka jinglong briew ngim lah ban biang”.
Lah ban kdew hangne ba ha katei ka thaiñ, ki don bun tylli ki shnong kiba la synshar da ki jaidbynriew Nepali namar ka jingbun paid ba ki la don naduh ki phew phew snem mynshwa.