Nongstoiñ, Naiwieng 16: Namar ka jingthut khah khah jong ka bording elektrik ha West Khasi Hills, ka ophis jong ka Meghalaya Energy Power Distribution Corporation Limited, ka kyrpad jur ïa ki paitbah nongpyndonkam bording hapoh ka District, ba kin ïaishah shipor bad ka don ruh ban pynsngewthuh ba ka jingthut ka bording kam dei tang mynsngi hynrei wat ha ka por mynmiet ruh.
Na ka liang ki bor ba dei peit ïa ka ophis sam bording ka kwah ruh ban pynshai ha ki paitbah, ba ka jingthut khah khah jong ka bording, ka dei namar ba katba nang mih ki sngi ki nongpyndonkam bording ki nang bun bad namar ba ki mashin bad ki kor pynmih bording ki barim ki dei kiba rit kim lah kit shuh, kumta ka ophis ka hap ban bujli da kiba thymmai bad kiba kham heh. Ha ka por ba ki bujli ïa kitei ki mashin ki hap ban pynlip shuwa ïa ka bording namar ka lada ym pynlip kabuh ïa ki nongtrei ha ka jingma.
Nalor kata ka don ruh ka jing maramot bad pynbha ïa ki 33/bad 11 Kv line kum ha Nongstoiñ, Nongpyndeng, Nongkasen, Riangdo, Rambrai, Shahlang bad kiwei kiwei ki jaka, kumta haba maramot bad pynbha ïa kitei ki line ruh hap ban pynlip ïa ka bording, khnang ba ki nongtrei kin lait na ki jingmynsaw.
Nalor kata ka ophis ka pynshai ruh sha ki paitbah ba ki mashin bording kiba thymmai bad kiba heh ki dei ki automatic mashin, kumta haba la pynlip ïa ka bording lada la pynmeh biang bad lada ka bording ka kham tlot, kim lah ban trei kam rwing hynrei ka shim por kumba katto kane haduh ba ka mashin ka la lah ban treikam.
Ka ophis ka pynshai ruh sha ki paitbah ba ka thut ka bording, ka dei ruh namar ka jingpyntrei ban pynheh ïa ki surok ha kaba ki don ki jaka ba ka surok ka ïaid na pdeng jong ka laiñ ba ki sainar eletrik ki kham tbian, ka don ka jingma haba ki puh shilum ki tih ïa ka surok ioh lehse kumno re kumno ki kum tyngkhuh ha ki sainar lane ka jingkhyllem jong ki post elektrik, kaba lah ban wanrah ïa ka jingmynsaw ym tang ïa ki ba trei surok hynrei ïa kiba ïaid ba ïeng ruh.
Ki bor pynïaid ka ophis ki la pynshai ruh ba ka jing duh bording ka don ruh ha ka por ba ki don ki tnad dieng kiba hap bad tyngkhuh bad ki fuse ki ing bad dkut noh. Lane ka don ka jingpei jong ki waïar jri kiba heh ha ki jaka buh mashin, hynrei haba don kiba kum kitei ki bynta ka ophis ka ïaleh katba lah ban moramot ha ka por kaba biang.
La ong ba ki don ki tiar na ka bynta ban kim don hapoh ophis la hap ban let thied na Shillong ne leit shim kylliang na Mairang, kumta ka kham shim por katto katne haduh ban da lah ban pynbiang ïa ka bording. Na ka liang ka ophis ka kyrpad jur ïa ki paitbah ba kin ïai shah namar ka jingthut jong ka bording, kam ktah tang ïa ki paitbah hynrei ka ktah ruh ïa ka revenue jong ka ophis.
