SHILLONG, Jylliew 27: U Myntri Rangbah jong ka jylla Meghalaya, u Conrad Sangma ryngkat bad u Myntri ka tnat Sports-Bah Shakliar Warjri, hynne ka Sngi Thohdieng ki la ïoh ban ïakynduh markhmat bad i Mei ieid Kmoiñ Wahlang, i nongïakop mareh ba pawnam bad ba satar tam jong ka jylla shuwa ba in leit ïashimbynta sha ka Marathon ka ban long ha ka ri Australia.
Na ka liang jong ka Sorkar Jylla kala mynjur bad kular ban ai ka jingkyrshan kaba pura na bynta i ne i mei ieid i ba la kot mynta 76 snem, i ba la ju tip barabor da i Kong Kmoin Wahlang, ha kaba i la shah jied ban leit mihkhmat syndon ïa ka Ri India sha ka jingïakop mareh kaba la tip da ka ‘Pan Pacific Master Games, 2024’ ka ban long ha Gold Coast, Australia.
Hynne ka Sngi Palei (27 tarik), u Myntri ka tnad Sports ka Jylla, Bah Shakliar Warjri u la ïoh ban synranlang ryngkat bad i mei ieid Kmoiñ ha ka jingleit kynduh ïa u Myntri Rangbah ka Jylla- Conrad K Sangma hapoh Secretariat.
Ha ba ïakren sha ki lad pathai khubor, na ka liang jong u Myntri ka tnat Sport ka jylla, u la ïathuh ba ma u ryngkat bad u Myntri Rangbah ki la ïoh ban ïakynduh markhmat bad i Mei ieid Kmoiñ, i ban sa leit ïashimbynta ha ka jingïakop mareh thong ha Australia ( ba kynthup ïa ka 10 Km, 5 Km, 3 Km, 1.5 km bad 500 meter).
U la pynpaw ruh ba na ka liang jong ka Sorkar ka long ba la kloi ban ai jingkyrshan bad ïarap namar kane ka jingleit ïashimbynta jong i kam long satia ka burom ïa ka jylla hynrei ïa ka ri India hi baroh kawei da kaba kitbok bad kyrmen ba i Mei ieid Kmoiñ in ïoh khur takma na kane ka jingïakop mareh.
U Bah Shakliar u la pynpaw ruh ïa ka jingsngew sarong halor ka jingïoh ban leit mihkhmat jong i ne i Mei ieid ïa ka ri.
“Nga ngeit kane ka pynsngew-sarong ïa ka Jylla baroh kawei ban ïohi ba i Longkmie ha ka rta jong i, 76 snem, in leit ban ïashimbynta ha ka ïakop mareh ba 10km. Ngi sngew kmen bha bad Ngi kitbok kitrwiang ba in dang ïoh ka met kaba koit kaba khiah bad ka jingkyrkhu u Blei ha ka lynti iaid jong i,” la bynrap u Bah Shakliar.
Kumban shu kdew, I Mei ieid Kmoiñ Wahlang, i ba ju shimbynta ha ki jingïakop mareh kiba jngai, dang khyndiat sngi i la shah khot ban donbyntalang bad ka kynhun India sha ka 13th Pan Pacific Master Games 2024, ban long ha u Naiwieng ha Queensland, Australia. Kane ka jingshah jied jong i ka la jia hadien ba i la seisoh ha ka lympung ïakop mareh kaba long ha Hyderabad.
Khyndiat haba ïakren bad i Mei ieid Kmoiñ, i la pynpaw ba lyngba ka jinglah jong i ban bteng ha ka ïakop mareh kan ai mynsiem ïaka pateng ban wan, bad i la ai khublei ruh ïa ka Sorkar kaba la kloi ban ai jingkyrshan.
“Nga kymen ban ïoh khur medal shabar ka Ri bad wanrah nam ym tang ïa ka Jylla hynrei ïa ka Ri baroh kawei,” pynkut i Mei ieid Kmoiñ.
