Shillong, Kyllalyngkot 13: Kan long ka burom ïa ka ri lum Garo Hills ba ïa ka Raj Bhavan ha Tura ïa kaba la plie mynta ka sngi da u Lat ka jylla u Phagu Chauhan, yn sah nyngkong eh da ka President ka Ri India ka Droupadi Murmu ha ka jingwan jong ka sha Tura ban plie ïa ka Meghalaya Games kaba San ka ban sdang ha ka 15th Kyllalyngkot 2024.
Kane ka jingwan jong ka President ar sngi lynter kan long ka sien kaba nyngkong ha kane ka jylla Meghalaya naduh ba la sha jied kum u President jong ka Ri India, ha kane ka jingwan kan plie ia ka 5th Meghalaya Games 2024 ha Tura ka dei ruh ka sien kaba nyngkong ba kane ka jingïalehkai kan long sha ri lum Garo.
Ka jingpynkhreh ha Tura ruh ka la dep lut nadong sha dong ban ban pdiang burom ïa ka President jong ka Ri India ba kan wan plie ïa ka Meghalaya Games 2024 kaba San bad na ka liang jong ki paidbah ka Tura ki la kyndeh ban ïoh pdiang burom ïa ka President.
Ha ka 16 tarik ka President jong ka Ri India kan ïa kynduh ïa ki paidbah ha Madan kaba don ha Mawphlang jan ka Law Kyntang bad ha kane ka jingiïakynduh ïa ki pidbah la dep ban jied na ki kynhun jong ki seng kynthei na ki shnong bapher bapher ar ngut ar ngut na kawei ka seng.
Na ka liang jong ki bor jong ka District Admisntration jong ka East Khasi Hills District ki la bunkam ban pynhreh ïa katei ka jaka ha kiba bun ki bynta, naduh ka jingsiang rong ïa ka surok da ka PWD, ka jingshna ïa ka rynsan, ka jingpynkhreh ïa ki jaka shong jong ki paidbah kiba la shah khot ha kane ka jingïalang bad ka President.
